Sarkaal ka tirsan Ciidanka Difaaca dalka (KDF) iyo askari booliis ah ayaa ka mid ah saddex qof oo lagu qabtay magaalada Mtito Andei, ka dib markii lagu eedeeyay inay ku lug lahaayeen falal baad ah oo lagu bartilmaameedsanayay milkiilayaasha baararka iyo dadweynaha.
Waaxda baarista dambiyada (DCI) ayaa sheegtay in tuhmanayaasha ay ku wareegi jireen goobaha ganacsiga, iyagoo cabsi gelinaya milkiilayaasha baararka isla markaana ka qaadanayay lacag. Waxaa la sheegay in ay magaalada ku dhex wareegi jireen gaari noociisu yahay Toyota Axio oo cad, si ay u muujiyaan awood iyo cabsi gelin.
Saddexda qof ee la qabtay ayaa lagu kala magacaabaa Samuel Ogando Odoyo oo ah sarkaal KDF ah, Onyango Nelson Kasera oo ah askari booliis ah, iyo Joseph Mulwa Mwambi oo ah qof rayid ah. Baaritaan dheeraad ah ayaa lagu ogaaday in gaarigii ay isticmaali jireen uu watay taariko been abuur ah.
Intii lagu guda jiray baaritaanka gaariga, waxaa laga helay qalab ay ka mid yihiin bastoolad iyo katiinado. Tuhmanayaasha ayaa la dhigay xabsi, waxaana la marsiiyay saf aqoonsi, halkaas oo dhibanayaasha ay ku aqoonsadeen. DCI-da ayaa sheegtay in ay diyaarinayso in maxkamadda la horgeeyo.
