Guddiga Madaxa bannaan ee Doorashooyinka iyo Xuduudaha dalka ee IEBC ayaa shaaciyay in 1.37 milyan oo Kenyaan ah ay isu diiwaangeliyeen codbixiyeyaal cusub tan iyo markii la bilaabay ololaha la xoojiyay ee diiwaangelinta joogtada ah 30-kii bishii hore ee Maarso. Tani ayaa muujinaysaa koror muuqda oo ka qaybgalka dadweynaha, iyadoo dalka ay isu diyaarinayo doorashada guud ee 2027.
War saxaafadeed ka soo baxay guddiga 17-kii bishan ayaa lagu sheegay in howsha ay si xawli ah u socotay maalmahan dambe, iyadoo 495,429 qof oo cusub la diiwaangeliyay toddobaad gudihiis tan iyo cusboonaysiintii 9-kii bishan April. Guddiga ayaa kororkan u aaneeyay ka qaybgal xooggan oo ay muujiyeen dhallinyarada markii ugu horreysay codeynaya, iyo sidoo kale ka qaybgal joogto ah oo ka jiray dhammaan deegaannada dalka.
Tirada guud ee isdiiwaangelinta cusub ayaa gaartay 1,370,930 qof, halka 92,602 codbixiye ay beddeleen goobahooda diiwaangelinta, 1,969 kalena ay cusboonaysiiyeen xogtooda. Xogta ayaa muujinaysaa in ka qaybgalka uu ka dhacay magaalooyinka waaweyn iyo meelaha fog fogba, iyadoo xitaa dad da’doodu ka weyn tahay 80 sano ay isdiiwaangeliyeen.
Guddiga ayaa tilmaamay in ka qaybgalkaasi yahay caddeyn muujinaysa kalsoonida dadweynaha ee nidaamka dimuqraadiyadeed, isla markaana ka tarjumaysa dadaalka shacabka ee ku aaddan go’aaminta mustaqbalkooda siyaasadeed. Howshan ayaa la qorsheeyay inay dhammaato 28-ka bishan April, iyadoo muwaadiniinta weli aan isdiiwaangelin lagu boorriyay inay ka faa’iidaystaan waqtiga haray.
