Hoggaamiyeyaasha isbahaysiga mucaaradka ayaa la filayaa inay ku wehlin doonaan Madaxweyne ku xigeenkii hore ee dalka Rigathi Gachagua safar uu ku tagayo deegaanka Othaya ee ismaamulka Nyeri Axadda maanta ah ka dib weerar lagu qaaday intii uu ku jiray cibaado kaniisadeed 25-kii bishii hore ee Janaayo.
Weerarkaasi ayaa sababay in mucaaradka ay qaadaan tallaabo degdeg ah. 30-kii Janaayo ayay hoggaamiyeyaasha mucaaradku u baxeen socod ay ku tageen xafiiska Taliyaha Guud ee Booliska Douglas Kanja ee Jogoo House si ay uga gudbiyaan cabashooyin ku saabsan handadaad, cabsi gelin iyo weerarro ay sheegeen in lagu beegsanayo hoggaamiyeyaasha mucaaradka iyo taageerayaashooda.
Ku xigeenka hoggaamiyaha xisbiga DCP Cleophas Malala, ayaa sheegay in tallaabadan ay timid ka dib dhacdooyin isdaba joog ah oo aan weli si dhab ah loo baarin. Gachagua ayaa sheegay in ay dib u bilaabayaan howlaha siyaasadeed, isla markaana ay qorsheynayaan inay tagaan deegaannada Othaya iyo Gitugi. Waxaa uu uga digay booliiska inay faragelin ku sameeyaan kulamada, isagoo sidoo kale ku eedeeyay cutub booliis oo gaar ah in loo adeegsaday in lagu beegsado intii uu socday cibaadada kaniisadda.
Gachagua ayaa sheegay in haddii aan tallaabo laga qaadin arrimahaas, mucaaradka ay abaabuli doonaan dibadbaxyo qaran si loo helo isla xisaabtan iyo isbeddel lagu sameeyo booliiska. Safarkan Othaya ayaa imanaya iyadoo mucaaradka ay sii xoojinayaan diyaar garowga doorashada guud ee 2027.
Isbahaysiga ayaa qorsheeyay kulan laba maalmood soconaya 12 iyo 13 Febraayo si ay uga wada hadlaan qaab dhismeedka isbahaysiga, magaca rasmiga ah iyo habka lagu dooran doono musharraxa madaxweyne. Safarka Axadda ee Othaya ayaa waxaa ka mid noqon doona cibaado kaniisadeed oo ka dhacda Gitugi iyo booqashooyin kale oo lagu mari doono Nyeri iyo Murang’a, iyadoo la filayo inay ka qeybgalaan Kalonzo Musyoka, Eugene Wamalwa, Justin Muturi, Martha Karua iyo hoggaamiyeyaal kale.
