Senator-kii hore ee Mandheera Billow Kerrow ayaa dhaliilay barasaabka ismaamulkaas Maxamed Aadan Khalif, isagoo ku eedeeyay maamulkiisa kharash aan loo baahnayn oo lagu bixiyay lacagta dadweynaha. Dhaliishan ayaa timid ka dib markii Guddiga Senate-ka ee Xisaabaadka Dadweynaha ay su’aalo ka keeneen sida loo maareeyay kharashaadka beeraha ee dowlad deegaanka.
Billow ayaa si gaar ah uga hadlay lacag dhan 55.9 milyan oo shillinka dalka ah oo lagu bixiyay geedo beereed, isagoo ku tilmaamay arrin aan mudnaan lahayn maadaama Mandheera ay tahay deegaan abaaruhu ku badan yihiin. Waxaa uu sheegay in beeraleyda ku nool hareeraha Webiga Dawa aysan helin taageero agab oo ku filan, halka lacago kale oo badan lagu bixiyay gurmad macluul.
Guddiga Senate-ka ayaa su’aalo ka keenay in lacagta lagu sheegay in loo isticmaalay geedo beereedka ay dhab ahaan ka muuqdaan dhulka iyo tirada beeraleyda ka faa’iideysatay. Waxaa ay sidoo kale baarayeen kharashaad kale oo ay ka mid yihiin lacagaha lagu bixiyay raashin gurmad, biyo gaarsiin iyo lacag si toos ah loo wareejiyay.
