Madaxweyne ku xigeenkii hore ee dalka ahna hoggaamiyaha xisbiga Democracy for Citizens Party (DCP) Rigathi Gachagua ayaa ku baaqay in dowladda ay si degdeg ah ugu dhawaaqdo in abaaraha ka jira gobolka Waqooyi Bari ay yihiin musiibo qaran. Waxaa uu sheegay in dadka deegaanka ay la ildaran yihiin gaajo daran, biyo la’aan iyo adeeg caafimaad oo aad u xaddidan.
Bayaan uu soo saaray Sabtidii ayuu ku dhaliilay hoggaamiyeyaasha gobolka, isagoo ku eedeeyay inay dayaceen bulshooyinka nugul isla markaana aysan gudan waajibaadkooda ah ilaalinta nolosha iyo nolol maalmeedka dadka.
Waxaa uu sheegay in xaaladda ay si weyn uga sii dartay, iyadoo xoolihii ay u dhimanayaan cunto iyo biyo la’aan, taas oo muujinaysa sii xumaanshaha xaaladda bini’aadantinimo ee halkaas ka jirta.
Gachagua ayaa xusay dhibaatada ay wajahaan agoomaha, haweenka carmalka ah iyo dadka xanuunsan, isagoo tilmaamay in qoysas badan ay la’ yihiin cunto iyo daryeel caafimaad aasaasi ah, arrintaas oo uu ku sababeeyay maamul xumo iyo dano gaar ah oo laga hormariyay danta shacabka.
Waxaa uu sidoo kale ugu baaqay dowladda dhexe inay isu keento dhammaan awoodaha iyo kheyraadka la heli karo si wax looga qabto dhibaatada loona badbaadiyo nolosha dadka.
Sidoo kale waxaa uu ugu baaqay beesha caalamka iyo hay’adaha horumarinta inay si degdeg ah u bixiyaan gargaar bini’aadantinimo oo la gaarsiiyo bulshooyinka ay dhibaatadu saameysay.
