Guddiga Arrimaha Maamulka iyo Amniga Gudaha ee Golaha Shacabka ayaa ka digay kororka isticmaalka kooxo abaabulan oo ku lug leh siyaasadda, iyagoo xusay in arrintan ay halis weyn ku tahay amniga qaranka, xilli dalka uu ku sii dhowaanayo doorashada guud ee 2027. Guddiga ayaa sheegay in kooxahan la xiriira siyaasadda ay si degdeg ah u noqdeen arrin caadi ah oo khatar ku ah nabadda, xasilloonida iyo hannaanka dimuqraadiyadeed.
Xildhibaannada guddiga ayaa hadalkan ka jeediyay booqasho rasmi ah oo ay ku tageen deegaan doorashada Sotik ee ismaamulka Bomet, halkaas oo ay ku qiimeynayeen diiwaangelinta dhalashada, dhimashada iyo kaararka aqoonsiga. Waxaa ay ka digeen in dalka uu halis ugu jiro inuu u leexdo fowdo sharci darro ah haddii aan si degdeg ah wax looga qaban.
Wafdiga ayaa waxaa ka mid ahaa xildhibaanno ay ka mid yihiin Dido Cali Rasso, Mburu Kahangara, Peter Kaluma iyo Peter Masara. Rasso, oo ah guddoomiye ku xigeenka guddiga, ayaa sheegay in arrinta kooxahan burcadda ah ay si weyn uga dhex taagan tahay doodaha Baarlamaanka, isla markaana ay bartilmaameedsanayaan hoggaamiyeyaasha, ganacsatada iyo xitaa saraakiisha amniga.
Digniintan ayaa timid ka dib rabshado siyaasadeed oo dhowaan dhacay, oo ay ka mid tahay weerar lagu qaaday senatarka Vihiga, Godfrey Osotsi, taas oo sare u qaaday walaaca laga qabo soo laabashada falal u eg maleeshiyaadkii lagu arkay xilliyadii doorashooyinka hore.
Dhanka kale, Wasiirka Arrimaha Gudaha Kipchumba Murkomen ayaa eedda dusha ka saaray qaar ka mid ah siyaasiyiinta, isagoo sheegay in khatarta ugu weyn ee amniga ay ka imanayso hoggaamiyeyaal awood leh oo dhallinyarada u abaabula falal rabshado ah halkii ay fursado shaqo u abuuri lahaayeen. Warbixin ay diyaarisay hindisaha Jukwaa la Usalama ayaa muujisay in dowlad deegaan ka Nairobi keliya ay ka jiraan ku dhowaad 130 kooxood oo ku lug leh rabshado siyaasadeed, afduub iyo dilal, halka ismaamullada kale sida Kakamega, Bungoma, Kisii, Kisumu iyo Homa Bay sidoo kale laga soo sheegay falal la mid ah.
Guddiga Baarlamaanka ayaa ballan qaaday inay arrintan si degdeg ah wax uga qaban doonaan, iyagoo soo jeedin doona sharciyo lagu xakameynayo faafitaanka kooxahan, si loo soo celiyo kalsoonida shacabka ee ku aaddan sharciga iyo nidaamka dowladeed, loogana hortago khataraha amni ee suuragalka ah ka hor doorashada 2027.
