Madaxweynaha dalka William Ruto, ayaa la filayaa inuu toddobaadkan u ambabaxo safar rasmi ah oo saddex maalmood ah oo uu ku tagayo dalka Talyaaniga, si loo xoojiyo xiriirka laba geesoodka ah ee u dhexeeya labada dal. Safarkan ayaa sidoo kale la filayaa inuu ka miro dhaliyo helidda dhaqaale lagu horumarinayo isbitaalka Guud ee ismaamulka Nyamira.
Madaxa Golaha Wasiiradda ahna Wasiirka Arrimaha dibadda iyo Qurba joogta Musalia Mudavadi, ayaa sheegay in safarka aanu ku koobnayn arrinta maalgelinta oo keliya, balse uu diiradda saarayo danaha istaraatiijiga ah ee ballaaran. Wadahadallada ayaa la filayaa inay ku saabsan yihiin ganacsiga, maalgashiga, isu socodka shaqaalaha, iyo xoojinta iskaashiga caalamiga ah, iyadoo sidoo kale la dardargelinayo xiriirka Kenya iyo dalalka Yurub.
Inta lagu jiro booqashada, waxaa la filayaa in la xoojiyo xiriirka dhaqaale ee hay’adaha Talyaaniga iyo ganacsiyada gaarka loo leeyahay, gaar ahaan dhinacyada kaabeyaasha dhaqaalaha, tamarta la cusboonaysiin karo, iyo suuq geynta wax soo saarka beeraha dalka. Waxaa sidoo kale la rajeynayaa in la saxiixo heshiisyo cusub, lana dedejiyo kuwa hore u jiray si loo kobciyo iskaashiga dhaqaale, iyadoo Kenya loo soo bandhigayo meel ku habboon maalgashi.
