Mas’uuliyiinta Zambia ayaa Isniintii xiray maxkamadaha ugu sarreeya dalka, taasoo ka hor istaagtay mucaaradka inay galaan xarumaha maxkamadaha maalintii ugu dambeysay ee ay awood u lahaayeen inay ku gudbiyaan dacwad ay kaga hortagayaan natiijada doorashadii muranka dhalisay ee bishan.
Qoraal kasoo baxay madaxa maamulka garsoorka, oo ay Reuters aragtay, ayaa sheegay in “sababo amni awgood, dhammaan shaqaalaha waxaa lagula talinayaa inaysan maanta shaqada imaan.”
Afhayeenka booliska, Godfrey Chilabi, ayaa Reuters u sheegay in qiimeynta xaaladda amniga ay weli socoto, wuxuuna diiday inuu faahfaahin dheeraad ah bixiyo. Afhayeen u hadlay garsoorka lama helin si uu arrintan uga hadlo.
Hoggaamiyaha mucaaradka, Brian Mundubile, ayaa toddobaadkii hore sheegay inuu qorsheynayo inuu dacwad u gudbiyo Maxkamadda Dastuuriga ah, si uu uga horyimaado natiijada doorashadii 13-ka Agoosto, taasoo uu kaalinta labaad ka galay isagoo ka dambeeyay Madaxweyne Hakainde Hichilema.
Waqtiga kama dambaysta ah ee lagu gudbin karo dacwadda noocan ah waa toddoba maalmood kadib marka natiijada doorashada lagu dhawaaqo, taasoo ku eg saacadaha hore ee Talaadada.
Xarunta Maxkamadda Sare ee Lusaka, oo sidoo kale ay ku taallo Maxkamadda Dastuuriga ah, dhammaan albaabbadii laga geli jiray way xirnaayeen, waxaana gudaha lagu arkayay boolis.
Hichilema ayaa ku guuleystay dib-u-doorashadiisa isagoo helay ku dhowaad 60% codadkii laga dhiibtay Zambia, oo ah waddan ku yaalla koonfurta Afrika isla markaana caan ku ah wax-soo-saarka naxaasta. Hase yeeshee, laba warbixinood oo ay soo saareen kormeerayaal madax-bannaan ayaa tilmaamay in tirada codadka Hichilema laga yaabo in la buunbuuniyay.
Hichilema ayaa beeniyay in wax khiyaano doorasho ah ay dhacday.
