Ra’iisul Wasaaraha Canada Mark Carney ayaa ku dhawaaqay canshuuro aargoosi ah oo lagu soo rogi doono Mareykanka, kadib markii Washington ay 50 boqolkiiba canshuur ku soo rogtay badeecooyin Canadian ah oo qiimahoodu gaarayo $20 bilyan.
Carney oo ka hadlayay Ottawa ayaa sheegay in canshuuraha cusub ee Canada lagu beegsan doono warshadaha birta, wax-soo-saarka caanaha iyo qalabka elektaroonigga ah ee Mareykanka, iyo kuwo kale. Canshuurahaas ayaa dhaqan geli doona 8-da Sebtembar.
Ku dhawaaqistan ayaa timid kadib markii wada-hadallo culus oo maalmo socday ay burbureen fiidnimadii Jimcaha, taas oo sii xumeysay xiriirka xasaasiga ah ee u dhexeeya labada dal ee muddo dheer ahaa saaxiibo iyo dalal ganacsi wadaaga.
Canshuuraha cusub ee Madaxweyne Donald Trump ayaa saameynaya waaxyo ay ka mid yihiin khamriga, alaabta guriga, wax-soo-saarka caanaha, shamiindada, dharka, ulaha kalluumeysiga iyo qalabka xeegada barafka.
Waxay saameynayaan badeecooyin qiimahoodu gaarayo ku dhowaad $20 bilyan, oo u dhiganta 5.5 boqolkiiba badeecooyinka Canada u dhoofiso Mareykanka.
Trump ayaa ka jawaabay ku dhawaaqista Carney, isagoo bartiisa Truth Social ku yiri: “Canada waxay dooneysaa faa’iidooyinka ay leedahay inay noqoto gobol Mareykan ah, iyadoo aan sidaas ahayn!!!”
Wuxuu sidoo kale sheegay in Canada ay muddo sanado ah canshuuro “aad u badan” ku soo rogi jirtay beeraleyda Mareykanka, isagoo raaciyay: “Mar dambe maya!!!”
Carney ayaa ka mid ah hoggaamiyeyaasha caalamka ee tirada yar ee si toos ah uga jawaabay canshuuraha Mareykanka, wuxuuna ballanqaaday inuu dhiso isbahaysiyo cusub oo dhinaca ganacsiga iyo militariga ah, inkastoo Canada ay Mareykanka ugu tiirsan tahay ku dhowaad 70 boqolkiiba dhoofinteeda.
Carney ayaa ka sheegay Ottawa in wada-hadalladii Mareykanka ay burbureen kadib markii Trump uu soo bandhigay shuruudo ugu dambeyn aan la aqbali karin, inkastoo wada-hadalladii hore ay ahaayeen kuwo rajo wanaagsan laga qabay.
