Tirada dhimashada ee weerarrada milateri ee ka socda Iiraan ayaa gaartay 787 qof, sida ay soo warraysay warbaahinta dowladda.
Dhinaca diblomaasiyadeed, Shiinaha ayaa si xooggan uga hortimid duqeymaha ay fuliyeen Maraykanka iyo Israa’iil, isaga oo ku baaqay in la joojiyo dagaalka oo dib loogu laabto wadaxaajood siyaasadeed si loo xalliyo khilaafka barnaamijka nukleerka ee Iiraan, kana digay in faragelin ciidan oo dheeri ah ay sii hurin karto xiisadda gobolka.
Intaa waxaa dheer, wasiirka gaashaandhigga ee Pakistan ayaa beeniyay warar sheegaya in colaadda laga bartilmaameedsanayo dalalka kale, islamarkaana ku baaqay in lagu dadaalo dadaallo diblomaasiyadeed oo nabadeed si loo yareeyo xiisadaha ka jira Bariga Dhexe, isagoo sheegay in Pakistan ay ku jirto dadaallo wadar ah oo lagu doonayo in lagu soo afjaro colaadda.
Xaaladda ayaa weli kacsan iyadoo falcelin caalami ah laga muujiyay dagaalka, waxaana jira baaqyo badan oo lagu doonayo in la joojiyo colaadda, lana bilaabo wadahadallo nabadeed si loo xakameeyo fiditaanka khilaafka iyo saameynta daran ee uu ku leeyahay shacabka iyo dhaqaalaha gobolka.
