Xoghayaha Joogtada ah ee Wasaaradda Arrimaha Gudaha, Raymond Omollo, ayaa ugu baaqay dhallinyarada gobolka Nyanza inay ka fogaadaan ku lug lahaanshaha mudaharaadyada, isagoo ka digay in siyaasiyiin qaarkood ay u adeegsadaan dano gaar ah.
Isagoo ka hadlayay munaasabad lacag ururin ah oo ka dhacday kaniisadda Rapedhi SDA ee deegaanka Ndhiwa ee ismaamulka Homa Bay, ayuu sheegay in gobolka uu horey u soo maray qalalaase, isla markaana loo baahan yahay in mudnaanta la siiyo nabad, xasillooni iyo horumar.
Omollo ayaa ka digay hoggaamiyeyaasha ku dhiirrigeliya dhallinyarada inay ka qeyb qaataan dibadbaxyada, isagoo xusay in arrimahaas ay khatar gelin karaan noloshooda isla markaana aysan keenin faa’iido muuqata oo bulshooyinka u soo hoyata. Waxaa uu carrabka ku adkeeyay in horumar waara lagu gaari karo oo keliya wada shaqeyn iyo hannaan nabadeed.
Sidoo kale, waxaa uu ugu baaqay shacabka inay taageeraan hoggaamiyeyaasha la doortay isla markaana la shaqeeyaan maamulka madaxweyne William Ruto, isagoo xusay in midnimada hoggaanka iyo shacabka ay saldhig u tahay horumar. Waxaa uu intaas ku daray in waxqabadka hoggaamiyeyaasha uu go’aamin doono mustaqbalkooda siyaasadeed.
