Nin 25 jir ah ayaa ku dhintay xabsiga saldhigga booliiska Malindi, dhacdadaas oo dhalisay walaac cusub oo ku saabsan dhimashada dadka ku jira xabsiyada booliiska.
Ninka dhintay, oo lagu magacaabi jiray Lucky Odhiambo Okoth, ayaa la xiray ka dib markii ay qabteen saraakiil ka tirsan Waaxda Baarista Dembiyada ee DCI-da, isaga oo lala xiriirinayay kiis la xiriira afduub loo geestay gabar 17 jir ah oo ka dhacday magaalada Malindi.
Ururka xuquuqul insaanka ee VOCAL Africa ayaa sheegay in diiwaannada booliiska ay muujinayaan in Okoth la helay isagoo meyd ah subaxnimadii Jimcaha ee gudaha qolkiisa xabsiga. Ururku ayaa sheegay in wararka booliiska ay tilmaamayaan in lagu helay isagoo isticmaalaya xadhig uu ka sameeyay dhar jeexjeexan.
Ururka ayaa sidoo kale su’aal geliyay sababta ninka loo dhigay kaligiis qol, inkastoo la sheegay in xabsiga ay ku jireen maxaabiis kale. Booliiska ayaa hore u sheegeen in baaritaanada kiiskan ay horseedeen in gabadha la raadinayay laga helay deegaanka Muyeye ee Malindi, kadibna dib loogu celiyay qoyskeeda iyadoo caafimaadkeeda la baaray.
