Xoghayaha Wasaaradda Caafimaadka Dadweynaha iyo Halbeegyada Xirfadaha, Mary Muthoni, ayaa ku boorisay shacabka inay joojiyaan isku-dawaynta ay u isticmaalayaan dawooyinka antibiyootigga ,iyadoo uga digtay in si xun u isticmaalka dawooyinkani ay dardargelinayso adkaysiga ay jeermisku u yeeshaan dawooyinka taasi oo khatar gelinaysa awoodda dalku u leeyahay inuu daweeyo caabuqyada caadiga ah.
Ayadoo hadal ka jeedinaysay kaniisad aagga Karen, Muthoni waxay sheegtay in antibiyootigga la qaadan karo oo kaliya marka uu kuu qoro xirfadle caafimaad oo aqoon u leh, waxayna ku adkaysatay in isticmaalka mas’uuliyadda leh ee dawooyinka ay muhiim u tahay ilaalinta caafimaadka dadweynaha.
Xoghayaha ayaa sidoo kale ugu baaqday qoysaska inay qaataan hababka ka hortagga caafimaadka, ayadoo sheegtay in tillaabooyin fudud sida faraxalka joogtada ah iyo ilaalinta nadaafadda hareeraha ay si weyn u yareyn karaan faafidda cudurrada.
Waxay ku dhiiragelisay qoysaska inay taageeraan ololaha Wasaaradda Caafimaadka ee EpukaUchafu (Ka Fogow Wasakhda) ayadoo la ilaalinayo nadaafadda deegaanka laguna dhaqmayo caadooyinka nadaafadeed ee caafimaadka leh.
Muthoni ayaa intaas ku dartay inay ku boorisay reer Kenya inay iska diiwaangeliyaan Hay’adda Caafimaadka Bulshada SHA, ayadoo xustay in diiwaangelintu ay u sahlayso qoysaska inay helaan adeegyada caafimaadka ee muhiimka ah, oo ay ku jirto daryeelka umusha oo bilaash ah.
Nadiifinta iyo ka-hortagga cudurrada ka sokow, waxay ka codsatay hay’adaha diimaha, waalidiinta iyo bulshada inay ka qaataan door firfircoon wax ka qabashada caqabadda sii kordhaysa ee isticmaalka maandooriyaha iyo mukhaadaraadka ee dhalinyarada dhexdeeda.
Waxay muujisay walaac ku saabsan kor u kaca isticmaalka nikotiinka iyo aaladaha sigaarka elektaroonigga ah ee dhalinyarada dhexdeeda, waxayna sheegtay in loo baahan yahay ficil wadajir ah si loo ilaaliyo faca soo koraya ee qabatinka iyo cawaaqibka caafimaad ee muddada dheer.
Muthoni waxay sheegtay in iskaashiga ka dhexeeya dawladda, ururada ku salaysan diinta iyo bulshada ay wali muhiim u tahay horumarinta hab-nololeed caafimaad leh, xoojinta qoysaska iyo horumarinta daryeelka caafimaadka ka-hortagga ah ee dalka oo dhan.
Baaqan ka soo baxay xoghayaha ayaa imanaya xilli Wasaaradda Caafimaadku ay sii xoojinayso ololayaasha wacyigelinta dadweynaha ee ku saabsan adkaysiga jeermiska dawooyinka, daryeelka caafimaadka ka-hortagga ah iyo nolol caafimaad leh, taas oo qayb ka ah dadaallada ballaaran ee lagu yareynayo culayska cudurrada laga hortagi karo ee ka jira dalka Kenya.
