Maxkamadda Sare ee Embu ayaa Isniintii bilowday baaritaan iyo dib u tirinta codadka lagu muransan yahay ee doorashadii ku celiska ahayd ee deegaanka Waqooyiga Mbeere, taas oo la qabtay bishii November 2025-kii.
Howshaan oo ay kormeeraysay Ku xigeenka Diiwaangeliyaha Maxkamadda Mercy Kinyua ayaa si rasmi ah u bilaabatay, balse waxaa ku yimid dib u dhac ka dib markii dacwoodaha uu ku guuldareystay inuu si degdeg ah u furo qufullo lagu xiray qol lagu keydiyo sanaadiiqda codadka iyo qalabka elektrooniga ee KIEMS.
Dib u tirinta codadka ayaa ka dambeysay amar uu Jimcihii hore si toos ah u bixiyay Garsoore Richard Mwongo, kaas oo faray in baaritaan lagu sameeyo goobaha codbixinta ee lagu soo sheegay khaladaad doorasho. Doorashadaas ayaa lagu dhawaaqay in uu ku guuleystay Leonard Wamuthende Njeru oo ka socday xisbiga United Democratic Alliance.
Si kastaba ha ahaatee, natiijadaas ayaa waxaa ka dacwooday Newton Kariuki Ndwiga oo ka tirsan Democratic Party, isagoo ku andacooday in doorashada ay ahayd mid aan si sax ah loo maamulin.
Maxkamadda ayaa amartay in la furo sanaadiiqda codadka lagana baaro dhowr goobood oo ay ka mid yihiin Gitiburi 1 iyo 2, Kaungu, hoolka bulshada ee Siakago, dugsiyada hoose ee Mwondu iyo Gikuyari, iyo sidoo kale goobo kale oo lagu daray liiska baaritaanka.
Xiisad kooban ayaa ka dhalatay maxkamadda ka dib markii dib u dhac ku yimid keenista furayaasha qolalka lagu keydiyo codadka, taas oo keentay in qareennada dhinacyada ay isku mari waayaan sida loo sii wado howsha. Ugu dambeyn, maxkamadda ayaa amartay in warbaahinta laga saaro goobta si loo sii wado howsha baaritaanka iyo dib u tirinta codadka.
