Ciidanka Ilaalada Kacaanka Islaamiga ah ee Iran ayaa sheegay in markab weyn oo shidaal qaada, kaas oo siday in ka badan laba milyan oo foosto oo saliid cayriin ah, uu dab qabsaday kaddib markii uu ku dhacay miino badeed xilli uu marayay marin-biyoodka Hormuz.
Ciidanka Iran ayaa sheegay in markabku uu marayay waddo aysan oggolaansho u haysan, markii ay dhacdadu dhacday.
Dhanka kale, laba markab oo shidaal qaada ayaa Jimcihii lagu weeraray meel ka baxsan xeebaha magaalada Jubail ee dalka Sacuudiga, sida ay sheegtay hay’adda UK Maritime Trade Operations ee la socota amniga maraakiibta ganacsiga.
Warbixinta hay’adda ayaa sheegtay in mid ka mid ah maraakiibta lagu weeraray bam-gacmeed laga soo tuuray doon yar, halka markabka kale uu ku dhacay walax aan weli la aqoonsan.
