Macallin dugsi Qur’aan oo wajahaya dacwad la xiriirta kufsi gabar 13 jir ah ayaa Isniintii lagu sii daayay dammaanad, kaddib markii uu ka soo hor muuqday maxkamadda Eldoret.
Garsoore Sare Cheronoh Kesse ayaa u oggolaatay Cabdullahi Khalif dammaanad lacageed oo ah 300,000 oo shillinka dalka ah, ama beddelkeeda dammaanad lacag caddaan ah oo ah 150,000 oo shilin, kaddib markii uu iska fogeeyay eedeymaha loo haysto.
Khalif ayaa lagu soo oogay dacwad kufsi ah oo waafaqsan Qodobka 8 (1) oo lala akhriyay Qodobka 8 (3) ee Sharciga Dambiyada Galmada ee sanadkii 2006-dii. Sida ay maxkamadda maqashay, falka lagu eedeeyay ayaa la sheegay inuu dhacay maalmo kala duwan intii u dhexeysay 20-ka Oktoobar ilaa 30-ka Nofeembar 2025-ka kaasoo ka dhacay aaga Kambi Mwangi ee deegaanka Turbo ee ismaamulka Uasin Gishu, halkaas oo lagu tuhunsan yahay inuu si ula kac ah u faraxumeeyay gabadha yar.
Eedeysanaha ayaa sidoo kale wajahaya dacwad kale oo beddel ah oo la xiriirta ku kacista fal anshax darro ah, taas oo la sheegay inuu taabtay xubnaha taranka ee gabadha yar.
Dacwad oogayaasha ayaa horay uga horyimid in eedeysanaha lagu sii daayo dammaanad, iyagoo ku sababeeyay khatar uu ka carari karo caddaaladda maadaama aan si cad loo ogeyn halka uu deggen yahay. Maxkamadda ayaa sidoo kale lagu wargeliyay in bulshada uu ku noolaa ay aad uga careysan yihiin eedeymaha loo haysto, isla markaana ay jirto cabsi ku saabsan ammaankiisa haddii la sii daayo.
Si kastaba, maxkamadda ayaa go’aamisay in shuruudaha dammaanadda la buuxin karo, iyadoo tixgelisay habraacyada sharciga. Kiiska ayaa mar kale la soo hadal qaadi doonaa 29-ka bishan Janaayo si loo bixiyo jihada xigta ee dacwadda.
