Kalkaaliyeyaasha isbitaalka Qaran ee Kenyatta ayaa joojiyay shaqo joojintii ay wadeen ka dib saacado wadahadallo ah, taasoo dib u soo celisay adeegyada isla markaana nafis u keentay bukaannada ku tiirsanaa isbitaalka ugu weyn ee gudbinta bukaannada dalka.
Wasiirka Caafimaadka, Aadan Barre Ducaale, ayaa xaqiijiyay in heshiis laga gaaray khilaafkii u dhexeeyay maamulka isbitaalka iyo Ururka Kalkaaliyeyaasha iyo Umulisooyinka ee KNUN, taasoo soo afjartay hakadkii ku yimid adeegyada caafimaad.
Heshiiska ayaa wax ka qabanaya cabashooyinkii waaweynaa ee kalkaaliyeyaasha, oo ay ka mid yihiin hagaajinta daryeelka caafimaad, nidaam cad oo dallacaad ah, iyo yareynta culayska shaqada. Waxaa kale oo lagu heshiiyay in si tartiib ah shaqaalaha qandaraaska ku jira loogu wareejiyo shaqooyin joogto ah oo leh gunno howlgab ah.
Shaqo joojinta ayaa salka ku haysay cabashooyin muddo soo jiitamayay, sida dib u dhaca mushaharka, amni la’aanta shaqo, iyo helitaanka xuquuqda howlgabka. Dowladda ayaa ballanqaadday in si buuxda loo hirgelin doono heshiiska, iyadoo kalkaaliyeyaasha lagu boorriyay inay si degdeg ah ugu laabtaan shaqadooda isla markaana sii wadaan bixinta adeeg caafimaad oo tayo leh.
