Hay’adda Dambi-baarista dalka ee (DCI) ayaa xoojisay diyaar-garowgeeda ku aaddan wax ka qabashada khataraha amni ee soo ifbaxaya magaalada Nairobi, iyadoo dalka uu isu diyaarinayo doorashada guud ee 2027.
Sarkaalka Dambi-baarista Gobolka Nairobi, Setim Kandie, ayaa sheegay in DCI ay xoojinayso tallaabooyinka lagu wajahayo arrimaha amni ee khatar gelin kara nabadda, kuwaas oo ay ka mid yihiin gooni-u-goosad, warar khaldan iyo warar been-abuur ah.
Kandie oo warbaahinta kula hadlay Nairobi ayaa sheegay in hay’addu sidoo kale diiradda saarayso dambiyada joogtada ah ee saameeya shacabka, sida boobka taleefoonnada gacanta, xatooyada gaadiidka iyo khiyaanooyinka loo yaqaan “kazi majuu”.
Waxa uu sheegay in tallaabooyinkan lagu fulinayo qaab iskaashi oo ay ku mideysan yihiin hay’adaha kala duwan ee ammaanka, iyadoo loo diyaar garoobayo doorashada, isla markaana la doonayo in la ilaaliyo jawi ku habboon doorasho xor, xalaal ah oo lagu kalsoonaan karo.
Kandie ayaa sidoo kale shacabka Nairobi u xaqiijiyey in DCI ay sii wadi doonto siyaasaddeeda ah in albaabadu u furan yihiin bulshada, isagoo dadka ku boorriyey inay soo gudbiyaan xog kasta oo la xiriirta khataraha amni si hay’adaha ay si degdeg ah uga jawaabi karaan.
“Shacabka waxay door muhiim ah ku leeyihiin bixinta xogta ku saabsan arrimaha amni ee saameynaya bulshooyinkooda,” ayuu yiri Kandie.
DCI ayaa shacabka ugu baaqday inay xaaladaha degdegga ah ku soo wargeliyaan khadadka Adeegga Booliska Qaranka ee 999, 911 iyo 112.
Tallaabooyinkan la xoojiyey ayaa imaanaya xilli hay’adaha ammaanka ay dadaal ugu jiraan xakamaynta falalka dambiyada ee khatar gelin kara doorasho nabdoon.
