Senatarrada ayaa doonayaan in la hakiyo lacagaha loo diro ismaamullada kuwaas oo guddoomiyayaashooda ay ka baaqdaan dhageysiyada xisaabaadka ee uu qaado guddiga Senate-ka ee la xisaabtanka dowlad deegaannada ee CPAC. Tallaabadan ayaa lagu beegsanayaa barasaabyada aan ka soo qaybgalin kulamada Guddiga Xisaabaadka Dadweynaha halkaas oo looga jawaabayo arrimaha ku saabsan maamulka maaliyadda ee ismaamullada.
Guddiga, oo uu hogaamiyo Senatar-ka Homa Bay Moses Kajwang ayaa la sheegay in ay soo wajahday xaalado badan oo guddoomiyeyaasha aysan imaanin si loo baaro isticmaalka lacagaha dadweynaha. Senatarrada ayaa sheegayaan in ka baaqashada warqadaha ay khatar gelinayso hantida shacabka oo daciifinayso kormeerka maaliyadda.
Qorshaha la soo jeediyay ayaa ka dalbanaya Xafiiska Kormeeraha Miisaaniyadda in uu ka hortago ansixinta bixitaanka lacagaha ka imanaya sanduuqa dakhliga ee ismaamulka marka guddoomiyaha uu ka baaqdo dhageysiga. Xafiiska ayaa ku tiirsanaan doona warqad ka socota karaaniga Senate-ka oo cadeynaysa in barasaabka ama mas’uulka xisaabaadka uu ka maqnaa kulanka ama uu ka soo qaybgalay markii dambe.
Senatarrada ayaa ku doodeen in guddoomiyeyaasha qaarkood ay marar badan ka baaqdeen casumaadaha, taasoo ka hor imaanaysa waajibaadkooda dastuuriga ah iyo sharciga ah ee ka jawaabidda lacagaha la siiyo ismaamulladooda. Fariinta ayaa sidoo kale digniin u ah in iska indhatirida casumaadaha Senate-ka ay dhaawacayso hufnaanta, isla xisaabtanka, iyo ixtiraamka hay’adaha dastuuriga ah. Barasaabyada qaarkood ayaa dhankooda ku eedeeyay senatarrada in kulamada loo rogay meel ay ku raadsanayaan faa’iido siyaasadeed ama hanjabaad.
