Ugu yaraan siddeed qof ayaa dhintay, halka 18 qof oo kalena weli la la’yahay kadib markii doon rakaab ah ay ku rogmatay meel ka baxsan waqooyiga Qubrus, sida uu sheegay madaxa maamulka Turkiga ee halkaas ka jira.
Ünal Üstel, oo ah ra’iisul wasaaraha Jamhuuriyadda Turkiga ee iskeed ugu dhawaaqday inay ka jirto Qubrus, ayaa sheegay in doontu ay sidday 259 rakaab ah iyo siddeed shaqaale ah markii ay billaabatay inay biyo qaadato kadib markii ay magaalada xeebta ah ee Kyrenia ka baxday Axaddii.
Kabtan-ka markabka iyo toddoba xubnood oo ka tirsan shaqaalaha ayaa la xiray iyadoo qayb ka ah baaritaan lagu ogaanayo sida ay musiibadani u dhacday, ayuu Üstel ku qoray baraha bulshada.
Mas’uuliyiintu waxay sheegeen in inta badan dadkii saarnaa la badbaadiyey. Hawlgal baadi-goob iyo samatabbixin ah oo ay iska kaashanayaan mas’uuliyiinta Turkiga ayaa socda.
Doontii ayaa hadda degtay, waxaana mas’uuliyiintu isku dayayaan inay soo helaan qalabka duuba xogta markabka si loo ogaado waxa dhacay.
Üstel wuxuu sheegay in doonta loo qorsheeyay inay Sabtidii u safarto Turkiga, balse safarka dib loo dhigay sababo la xiriira xaaladaha cimilada oo xumaa.
Wuxuu u sheegay warbaahinta Turkiga ee TRT in doonta ay ku dhaceen laba hirar ka hor inta aysan rogman.
Wuxuu sheegay in markii kabtanka markabku uu isku dayayay inuu ka soo kabto hirkii ugu horreeyay, uu hirkii labaad ku dhuftay, taasina ay keentay inay doontu biyo qaaddo.
Diyaarado helikobtarro ah iyo doonyaha ilaalada xeebaha ayaa loo diray goobta, halka ambalaasyo lagu diyaariyey xeebta si ay u qaabilaan rakaabka la badbaadiyey.
