Senatorka ismaamulka Kajiado, Seki Lenku Kanar, ayaa ku baaqay in Wasiirka Arrimaha Gudaha Kipchumba Murkomen iyo Xoghayaha joogtada ah ee waaxda Raymond Omollo ay xilka iska casilaan, isagoo ku eedeeyay inay ku guuldarreysteen wax ka qabashada burcadeynta siyaasadeed ee sii kordheysa dalka.
Isagoo ka hadlayay deegaanka Loitoktok ee Koonfurta Kajiado, ayuu sheegay in Wasaaradda Arrimaha Gudaha aysan si wax ku ool ah uga jawaabin falalka rabshadaha ah ee lagu beegsanayo hoggaamiyeyaasha siyaasadda. Waxaa uu intaa ku daray in xaaladdan ay abuurtay cabsi soo wajahday hoggaamiyeyaasha si furan u dhaliila dowladda.
Lenku ayaa sheegay in weerarrada ka dhanka ah siyaasiyiinta ay si joogto ah u soo badanayaan toddobaadyadii la soo dhaafay, iyadoo aan tallaabo muuqata laga qaadin dadka ka dambeeya falalkaas. Waxaa uu ka digay in arrintan ay halis gelinayso hanaanka dimuqraadiyadda iyo xorriyadda hadalka.
Senatorka ayaa ku adkeystay in hoggaanka uu mas’uul ka yahay xaaladda sii xumaanaysa ee amniga, isagoo ugu baaqay hay’adaha amniga inay dhexdhexaad ahaadaan oo ay ilaaliyaan dhammaan muwaadiniinta iyadoon loo eegin aragtidooda siyaasadeed. Waxaa uu sidoo kale ugu baaqay hoggaamiyeyaasha kale inay si cad uga hadlaan rabshadaha, maadaama aamusnaanta loo fasiran karo oggolaansho.
