Madaxweyne William Ruto ayaa ku dhawaaqay kordhin weyn oo lagu sameeyay maalgelinta warshadaha hal abuurka dalka, iyadoo dowladda ay gaarsiisay 1 bilyan oo shillin. Tallaabadan ayaa la socota dib u habayn siyaasadeed iyo mid maamul oo lagu doonayo in Kenya laga dhigo xaruun Afrikaan ah oo ku caan baxda filimada, sheekooyinka iyo farshaxanka dijitaalka ah.
Go’aankan ayaa yimid ka dib codsi uu soo jeediyay filim sameeye khibrad leh oo lagu magacaabo John Karanja, kaas oo lagu sharfay abaal marin gaar ah oo lagu aqoonsaday 30 sano oo uu ka shaqeynayay warshadaha filimada ee dalka. Karanja ayaa ka codsaday dowladda in si rasmi ah loo kordhiyo taageerada si loo xoojiyo wax soo saarka iyo horumarinta hibada.
Madaxweynaha ayaa sheegay in dowladda ay aqbashay taladaas, isla markaana uu ku ammaanay Karanja doorkiisa, isagoo sidoo kale ku abaalmariyay 2 milyan oo shillinka dalka ah. Waxaa uu intaas ku daray in dowladda ay si weyn u ballaarinayso fursadaha hal abuurka, isla markaana ay dejisay qorshe lagu taageerayo shaqo abuurka iyo kobcinta dhaqaalaha hal abuurka.
Sidoo kale, madaxweyne Ruto ayaa sheegay in la sameeyay qaab dhismeed cusub oo lagu maamulo warshadaha hal abuurka, laguna daray xafiisyo gaar ah oo filimada, muusigga iyo ciyaaraha dijitaalka ah. Waxaa uu sidoo kale ku baaqay in la dedejiyo sharciyo cusub oo taageera hal abuurka, isla markaana Kenya ay si firfircoon uga qayb gasho suuqyada caalamiga ah ee lacag bixinta hal abuurka, si loo ballaariyo fursadaha fannaaniinta iyo hal abuurayaasha dalka.
