Maamulaha hoteel ku yaalla magaalada Homa Bay ayaa tirinaya khasaaraha soo gaaray, kaddib markii koox dhallinyaro ah ay fiidnimadii Sabtida weerareen Homa Bay Tourist Hotel, halkaas oo ay ku burburiyeen hanti aan weli la qiimeyn.
Sida ku cad warbixin uu booliiska u gudbiyay maamulaha hoteelka, Robert Odongo, dhallinyaradaasi waxay hoteelka galeen abbaaro 8-dii fiidnimo. Waxay jebiyeen daaqadaha, burburiyeen alaabtii guriga iyo qalab kale, halka qaar ka mid ah alaabtii hoteelkana ay la tageen.
Booliisku waxay xaqiijiyeen in hoteelka la burburiyay isla markaana qaar ka mid ah alaabtiisa la xaday. Waxay intaas ku dareen in markii ay goobta gaareen, dadkii falka geystay ay hore uga baxsadeen iyagoo wata mootooyin.
Dhacdadan ayaa timid xilli la isku diyaarinayo isu-soo-baxii Linda Mwananchi ee laga qorsheeyay ismaamulka Homa Bay, kaas oo uu hoggaaminayo Senator-ka Nairobi, Edwin Sifuna.
Sawirro hore oo laga soo qaaday Nyandiwa ee Homa Bay ayaa muujiyay waddooyin la xiray iyo iska horimaadyo dhex maraya laba kooxood oo iska soo horjeeda, xilli isu-soo-baxaasi la qaban rabo.
Xildhibaanka magaalada Homa Bay, Peter Kaluma, ayaa kooxda Linda Mwananchi uga digay inay hal-ku-dhegyada ay ugu yeeraan “wantam” ee uu ku tilmaamay kuwo aan micno lahayn, la yimaadaan ismaamulka Homa Bay. Wuxuu sheegay in wax kasta oo ay adeegsan doonaan uu dhisay Madaxweyne William Ruto.
