Qareennada difaacayay siyaasiga Rose Mbithe Mulwa iyo labadeeda carruur ayaa ka baxay kiiska dilka dhakhtar ku takhasusay cudurrada dhimirka, Dr. Victoria Nthunya Mutiso, iyagoo sheegay in ay isku khilaafeen eedaysanayaasha talooyinka sharci ee ay siinayeen.
Qareennada oo uu hoggaaminayay Cliff Ombeta ayaa Maxkamadda Sare ee Milimani ka sheegay in aysan doonayn inay sii wadaan matalaadda Rose Mbithe Mulwa, wiilkeeda Chris Mulwa iyo gabadheeda Angela Mulwa. Waxay maxkamadda ka codsadeen in magacyadooda laga saaro diiwaanka kiiska.
Qareennadu waxay sheegeen in eedaysanayaashu aysan raacayn talooyinkooda sharci, taas oo ay ku tilmaameen inay adkeyneyso inay sii wadaan difaaca.
Arrintan ayaa dhacday xilli saddexda eedaysane, oo ay weheliyaan laba qof oo kale, ay hor tageen Garsoore Alexander Muteti si ay uga jawaabaan eedda dilka Dr. Mutiso, oo la sheegay in la toogtay 29-kii Luulyo 2026.
Rose Mbithe Mulwa, labadeeda carruur, Constable-ka Booliiska Elijah Kimoi iyo Maritim Kimutai dhammaantood waxay maxkamadda ka hor sheegeen inaysan wax dambi ah lahayn.
Dhanka kale, eedaysanayaashu waxay maxkamadda u gudbiyeen cabashooyin ku saabsan jirdil iyo tacaddi ay sheegeen inay kala kulmeen intii ay ku jireen xabsiga.
Angela Mulwa ayaa sidoo kale sheegtay in Constable Elijah Kimoi lagu cadaadiyay inuu walaalkeed Chris ku eedeeyo inuu ahaa qofkii toogashada fuliyay.
Dacwad-oogayaasha ayaa maxkamadda ka codsaday 14 maalmood si ay uga jawaabaan qoraallada difaaca, balse Garsoore Muteti wuxuu amray in dowladda ay jawaabteeda ku soo gudbiso muddo 7 maalmood ah.
Maxkamaddu waxay 6-da Oktoobar 2026 u asteeysay dhageysiga codsiyada dammaanadda iyo sii-daynta eedaysanayaasha.
Baaritaannada ilaa hadda waxay kiiska dilka Dr. Mutiso ku xiriiriyeen muran dhul oo muddo dheer soo jiitamayay, kaas oo la sheegay inuu u dhexeeyay qoyskeeda iyo Rose Mbithe, oo ahayd xaaskii hore ee ninka Dr. Mutiso, Professor David Musyimi Ndetei.
Baaritaanka ayaa sidoo kale xiriir la sameeyay dilkii Sebtembar 2025 loo geystay qareen caan ahaa Kyalo Mbobu, kaas oo xilligaas matalayay Ndetei, iyadoo ay jireen muran sharci oo la xiriiray Mbithe.
