Hay’adda Badbaadada iyo Gaadiidka Qaranka ee NTSA ayaa sheegtay in kaabeyaasha waddooyinka oo liita, hab-dhaqanka darawallada iyo xaaladda gaadiidka ay ka mid yihiin sababaha sii kordhinaya shilalka waddooyinka dalka.
Tani ayaa kusoo beegmaysa iyadoo tirada dadka ku dhimanaya shilalka waddooyinka Kenya sanadkan ay ku dhowdahay 4,000 qof.
Agaasimaha Badbaadada Waddooyinka ee NTSA, Dr. Andrew Kipalgat, ayaa sheegay in dhimashada joogtada ah ee ka dhalata shilalka waddooyinka ay weli tahay walaac weyn, inkastoo ay hay’addu muddo dheer wadday wacyigelin iyo howlgallo lagu xoojinayo badbaadada waddooyinka.
NTSA ayaa sheegtay in in ka badan 3,000 qof oo Kenyan ah ay sannad kasta ku dhintaan shilalka waddooyinka, iyadoo dadaallada wax looga qabanayo ay ka mid yihiin baaritaanka gaadiidka, fulinta shuruucda waddooyinka iyo ololeyaasha wacyigelinta bulshada.
Sida ay sheegtay NTSA, xaaladda gaadiidka ayaa qayb ka ah qiyaastii 17 boqolkiiba shilalka waddooyinka. Hay’addu waxay xustay in marka la baarayo sababta shil, loo baahan yahay in la eego xaaladda gaadiidka, tayada iyo naqshadda waddada, hab-dhaqanka dadka isticmaala waddooyinka iyo adeegyada gurmadka degdegga ah.
NTSA ayaa sidoo kale aqoonsatay in ka badan 270 goobood oo loo aqoonsaday meelaha shilalku ku badan yihiin ee dalka, iyadoo 199 ka mid ah ay ku yaallaan jidka weyn ee Mombasa-Malaba.
Dr. Kipalgat ayaa tusaale u soo qaatay qaybta Salama ee waddada Nairobi-Mombasa, halkaas oo shil dhowaan ka dhacay ay dad dhowr ah ku dhinteen.
Waxa uu sheegay in waddada oo loo sameeyo laba jiho oo kala go’an, , ay yareyn karto khatarta ka dhalata gaadiidka labada jiho isku wajaha.
Dhanka kale, NTSA waxay sheegtay inay xoojisay howlgallada lagu fulinayo shuruucda waddooyinka, gaar ahaan xadgudubyada lala xiriiriyo shilalka habeenkii dhaca.
Hay’addu waxay sheegtay in saddexdii bilood ee lasoo dhaafay laga hakiyay rukhsadaha wadista 25 darawal, halka 20 urur oo matatu ah, ama SACCO-yo, loo yeeray kadib markii gaadiidkooda lagu helay xadgudubyo ka dhan ah shuruucda waddooyinka.
Sidoo kale, in ka badan 2,400 gaari ayaa muddadaas lagu qabtay howlgallada lagu xoojinayo badbaadada waddooyinka.
