Wasaaradda Arrimaha Dibadda ee Mareykanka ayaa digniinta safarka Kenya ka dallacsiisay heerka 2-aad una wareejisay heerka 3-aad, iyadoo muwaadiniinta Mareykanka kula talisay inay dib uga fiirsadaan safarka ay ku tagayaan dalka, sababo la xiriira khataro caafimaad oo ay ka mid tahay faafitaanka cudurka Ebola ee uu keeno fayraska Bundibugyo.
Digniinta oo dib loo cusbooneysiiyay 19-kii Oktoobar 2026, ayaa sidoo kale lagu xusay khataraha la xiriira dambiyada, afduubka, argagixisada, qalalaasaha bulshada iyo badbaadada waddooyinka.
Kenya ayaa Axaddii xaqiijisay kiis cusub oo Ebola ah, taasoo tirada guud ee dadka uu cudurku ku dhacay ka dhigaysa siddeed qof.
Aggaasimaha Guud ee Caafimaadka Kenya, Patrick Amoth, ayaa sheegay in Wasaaradda Caafimaadku Axaddii baaritaan ku sameysay 38 qof, isla markaana hal qof laga helay fayraska Ebola ee nooca Bundibugyo.
Qofka laga helay cudurka ayaa ah shaqaale daryeel oo bukaannada caawiya.
Hay’adaha caafimaadka ayaa weli wada baaritaanno, raadraaca dadka xiriirka la yeeshay bukaannada iyo qiimeynta khatarta faafitaan hor leh, iyadoo dadaallada lagu xakameynayo cudurku ay socdaan.
Digniinta Mareykanka ayaa dadka safarka ah kula talinaysa inay qaataan tallaabooyin looga hortagayo la kulanka fayraska, oo ay ka mid yihiin inay ka fogaadaan dadka leh astaamaha lagu garto Ebola iyo taabashada dheecaannada ka yimaada jirkooda.
Astaamaha cudurka waxaa ka mid noqon kara qandho, madax-xanuun, murqo-xanuun, tabar-darro, shuban, matag iyo calool-xanuun. Marxaladaha dambe ee cudurka waxaa dhici kara dhiig-bax ama nabarro aan sababtooda la garanayn.
Xarumaha Xakamaynta iyo Kahortagga Cudurrada ee Mareykanka (CDC) ayaa kula talinaya qof kasta oo isku arka astaamo la jaanqaadaya Ebola inuu isla markiiba dadka kale ka fogaado, uusan safrin, isla markaana la xiriiro hay’adaha caafimaadka ee deegaanka ama xarun caafimaad si uu u helo tilmaamo ku habboon.
Dadka safarka ku jira ee u baahan daryeel caafimaad ayaa lagula talinayaa inay xarunta caafimaadka wacaan ka hor inta aysan tegin. Tani waxay shaqaalaha caafimaadka siinaysaa waqti ay ugu diyaar garoobaan imaanshahooda, isla markaana ay ku qaadaan tallaabooyin lagu ilaalinayo shaqaalaha iyo bukaannada kale.
Marka laga soo tago khataraha caafimaad, Wasaaradda Arrimaha Dibadda ee Mareykanka ayaa soo saartay digniino si cad uga digaya in loo safro qaybo ka mid ah Kenya, sababo la xiriira khataraha amni ee ay ka mid yihiin dambiyada, afduubka, argagixisada iyo qalalaasaha.
Nairobi gudaheeda, wasaaraddu waxay muwaadiniinta Mareykanka kula talisay inaysan u safrin xaafadaha Eastleigh iyo Kibera, sababo la xiriira khatarta dambiyada iyo afduubka.
Digniinta ayaa sidoo kale khuseysa ismaamullada Garissa, Wajir, Mandera, Lamu iyo Tana River, marka laga reebo Beerta Qaranka ee Tsavo. Waxaa sidoo kale ku jira qaybo ka mid ah ismaamulka Kilifi oo ku yaalla waqooyiga waddada weyn ee C103 iyo deegaannada xeebaha ee waqooyiga Malindi.
Wasaaraddu waxay sheegtay in deegaannadaas ay ka jiraan khataro la xiriira afduub iyo argagixiso.
Ismaamulka West Pokot iyo galbeedka ismaamulka Turkana ayaa sidoo kale lagu daray deegaannada aan lagu talinayn in loo safro, sababo la xiriira khataraha dambiyada.
Intaa waxaa dheer, Wasaaradda Arrimaha Dibadda ee Mareykanka ayaa ka digtay safarrada lagu tagayo qaybo ka mid ah ismaamullada Marsabit iyo Turkana oo u jira xadka Itoobiya masaafo dhan 50 kiiloomitir, iyadoo sabab uga dhigtay khatarta qalalaasaha.
CDC ayaa kula talisay dadka Kenya u safraya inay raacaan taxaddarrada caafimaad ee caadiga ah.
Digniinta guud ee heerka 3-aad waxay muwaadiniinta Mareykanka kula talinaysaa inay dib uga fiirsadaan safarka Kenya, balse macnaheedu ma aha in gebi ahaanba laga mamnuucay safarka dalka.
Digniintan cusub ayaa soo baxday iyadoo hay’adaha caafimaadka Kenya ay sii wadaan dadaallada lagu xakameynayo faafitaanka Ebola, isla markaana ay qiimeynayaan suurtagalnimada in cudurku sii faafo.
