Ku-xigeenka safiirka Iiraan u fadhiya Qaramada Midoobay, Gholamhossein Darzi, ayaa Maraykanka iyo Israa’iil ku eedeeyay inay dambiyo dagaal ka geysteen dalka Iiraan, kuwaas oo ay ku dhinteen dad rayid ah, oo ay ku jiraan 254 carruur ah, sida uu sheegay.
“Iiraan ayaa ah dhibbanaha dagaalkan, mana aha cidda gardarrada wada,” ayuu Darzi ka sheegay Golaha Ammaanka ee Qaramada Midoobay.
Darzi ayaa labada dal ku eedeeyay inay si ula kac ah u beegsadeen goobaha ay deggen yihiin dadka rayidka ah, iskuullada, isbitaallada, garoomada diyaaradaha, xarumaha tamarta iyo kaabayaasha kale ee rayidka.
“Maraykanku ma geysan karo gardarro, ma sababi karo dhimashada dad rayid ah oo tiro badan, dabadeedna golahan uma adeegsan karo inuu isaga isu muujiyo dhibbane,” ayuu yiri diblomaasigu.
Darzi ayaa sidoo kale kulanka ku soo bandhigay sawirro carruur ah oo uu sheegay in lagu dilay duqeymaha Maraykanka iyo Israa’iil, oo ay ku jiraan carruur ku dhimatay weerar lagu qaaday iskuul.
Wuxuu sheegay in sawirradaasi ay matalayeen oo keliya tiro yar oo ka mid ah 254-ka carruurta ah ee uu sheegay in lagu dilay weerarrada.
“Dhammaan dadkii amray, fuliyay, isla markaana fududeeyay dambiyadan foosha xun waa in lala xisaabtamaa, halkii ay ka heli lahaayeen inaan loo raacan dambiyadooda,” ayuu raaciyay.
