Ganacsatada xaafadda Islii ayaa ka codsatay Hay’adda Cashuuraha ee (KRA) in la sameeyo barnaamijyo wacyigelin ah oo ka caawiya ganacsatada fahamka cashuuraha, ka dib kulan ay ganacsatada iyo mas’uuliyiinta cashuuraha ku yeesheen xafaadda Arbacadii.
Kulanka, oo uu hoggaaminayay guddoomiyaha KRA, George Obell, ayaa isu keenay xubnaha bulshada ganacsatada si looga wada hadlo u hoggaansanaanta cashuuraha muhiimka ah, sida Cashuurta Qiimaha Lagu Daray ee VAT-ga iyo Cashuurta Dakhliga Ganacsiga TOT-ga. Doodaha ayaa xoogga saaray baahida loo qabo in si joogto ah loogu xirnaado ganacsatada, isla markaana la fahmo caqabadaha qaar ka mid ah ganacsiyada ay la kulmaan marka ay doonayaan inay cashuurahooda bixiyaan.
Xubnaha ganacsatada ayaa sheegay in inkastoo ganacsato badan ay cashuurahooda bixiyaan, haddana qaar yar ay ka maqan yihiin nidaamka sababo la xiriira aqoon la’aan ku saabsan sida loo bixiyo cashuuraha iyo waddooyinka loo maro. Farqigan ayaa abuuray jahwareer, isla markaana xaddiday u hoggaansanaanta buuxda ee ganacsiyada deegaanka. Cumar Xuseen oo ah xoghayaha guud ee ururka ganacsatada Islii, ayaa sheegay in loo baahan yahay wacyigelin joogto ah si loo horumariyo u hoggaansanaanta. Waxaa uu ku booriyay ganacsatada inay ka qaybqaataan bixinta cashuuraha oo ay fahmaan qaybaha kala duwan ee khuseeya ganacsigooda.
Cumar ayaa sidoo kale carrabka ku adkeeyay ganacsatada in ay dhammaan macamishooda siiyaan risiit rasmi ah, isagoo sheegay in tani ay qeyb ka tahay u hoggaansanaanta cashuuraha isla markaana ka caawineyso ganacsatada iyo KRA inay hayaan diiwaanno sax ah. Waxaa uu intaa ku daray in qof kasta oo aan u hoggaansamin uu la kulmi karo ganaaxyo iyo qiimeyn cashuureed oo culus. Dhanka kale, guddoomiye Obell ayaa sheegay in ganacsatada Islii ay fahamsan yihiin waajibaadkooda cashuureed, isla markaana diyaar u yihiin inay u hoggaansamaan, balse ay u baahan yihiin taageero iyo wacyigelin dheeri ah. KRA ayaa qorsheynaysa in barnaamijyo wacyigelin ah lagu qabto xaruumaha ganacsi ee xaafadda, sidoo kalena xafiis joogto ah la dhiso si bulshada ganacsatada loogu fududeeyo adeegga.
