Ciidamada dambi-baarista Kenya ayaa gacanta ku dhigay gaari nooca raaxada ee Land Rover Discovery ah oo laga soo xaday dalka Ingiriiska, kaddib howlgal ballaaran oo lagu bartilmaameedsaday shabakadaha xada baabuurta ee ka howlgala gudaha Kenya iyo dalal kale.
Howlgalkan oo socday muddo toddobaad ah ayaa loogu magac daray Operation Carback II, waxaana iska kaashaday hay’ado kala duwan oo amniga iyo sharciga u qaabilsan dalka. Intii uu howlgalka socday, dambi-baarayaashu waxay weerareen goob lagu iibiyo baabuurta oo ku taalla Waddada Northern Bypass ee ismaamulka Nairobi, halkaas oo ay ka soo qabteen Land Rover Discovery cawl ah oo lambarkiisu yahay KCY 001J.
Baaritaan lagu sameeyay keydka xogta booliska caalamiga ah ee INTERPOL ayaa xaqiijiyay in gaariga laga soo sheegay in laga xaday dalka Ingiriiska.
Gaariga ayaa markii dambe lala wareegay, waxaana loo gudbiyay xarunta dhexe ee Waaxda Dambi-baarista Kenya (DCI) si baaritaanno dheeraad ah loogu sameeyo.
Howlgalkan waxaa hoggaaminayay DCI, gaar ahaan waaxda INTERPOL ee Nairobi iyo waaxda howlgalada, iyadoo ay ka qeyb qaateen hay’ado kale oo ay ka mid yihiin hay’adda gaadiidka iyo badbaadada waddooyinka (NTSA), hay’adda canshuuraha (KRA), xafiiska dacwad-oogaha guud (ODPP), hay’adda tayada badeecadaha (KEBS), booliska Kenya iyo booliska maamulka.
DCI ayaa sheegtay in Kenya ay ku biirtay dalalka xubnaha ka ah INTERPOL ee ka qeyb qaatay howlgal caalami ah oo isku mar laga fuliyay dalal kala duwan, kaas oo lagu fuliyay mashruuca Project Drive Out, iyadoo lala kaashaday hay’adda Midowga Yurub u qaabilsan iskaashiga sharci-fulinta ee Europol.
Howlgalka ayaa sidoo kale lagu ogaaday gaadiid kale oo laga shakiyay. Deegaanka Galbeedka Thika , dambi-baarayaashu waxay heleen gaari cad oo nooca Mercedes-Benz , kaas oo watay taarikada KBZ 325J, hase yeeshee baaritaannadu muujiyeen in lambarkaasi uu ka diiwaangashan yahay gaari Suzuki station wagon ah oo oranji ah. Arrintan ayaa dhalisay shaki ku saabsan aqoonsiga iyo diiwaangelinta gaariga, waxaana loo gudbiyay baaritaanno dheeraad ah.
Dhanka kale, deegaanka Embakasi, waxaa lagu soo qabtay gaari xamuul-qaade ah oo nooca forklift-ka ah, kaas oo watay taarikada KAD 132K. Baaritaanno hordhac ah ayaa muujiyay in taarikadaasi uusan lahayn .
Waxaa sidoo kale la ogaaday in lambarkii aqoonsiga ee shaashadda gaariga la tirtiray, taas oo dhalisay shaki dheeraad ah, waxaana kiiska loo gudbiyay waaxda DCI ee Embakasi.
Howlgal la mid ah oo la sameeyay sannadkii 2024 ayaa horseeday in dalka oo dhan lagu baaro in ka badan 1,800 oo gaari, halka in ka badan 260,000 oo gaari laga hubiyay keydka xogta INTERPOL.
DCI ayaa sheegtay in natiijooyinkani ay muujinayaan muhiimadda ay leeyihiin howlgalada ku saleysan xogaha sirdoonka, iskaashiga hay’adaha kala duwan iyo wadaagista xogaha caalamiga ah si loo ogaado loona burburiyo shabakadaha xada baabuurta. Hay’addu waxay xaqiijisay inay sii wadi doonto wada shaqeynta hay’adaha gudaha, kuwa gobolka iyo kuwa caalamiga ah si loo soo celiyo hantida la xaday, loona horkeeno sharciga dadka ku lugta leh falalka dambiyadaas.
