Saraakiil sare oo ka tirsanaa waaxda tamarta oo lagu eedeeyay faragelin lagu sameeyay xogta kaydka shidaalka iyo musuq ku lug leh soo dejinta shidaalka ayaa lagu sii daayay dammaanad, iyadoo baaritaanno ay weli socdaan isla markaana la filayo in maxkamadda la horgeeyo maalmaha soo socda.
Dadka baaritaanka lagu hayo ayaa waxaa ka mid ah xoghayihii hore ee shidaalka Maxamed Liibaan, agaasimihii hore ee shirkadda dhuumaha KPC Joe Sang, iyo agaasimihii hore ee hay’adda nidaaminta tamarta EPRA Daniel Kiptoo Bargoria. Sidoo kale waxaa baaritaan ku socda saraakiil kale oo ay ka mid yihiin ku xigeenka agaasimaha shidaalka Joseph Wafula iyo maareeye ka tirsan shirkadda dhuumaha shidaalka Joel Mburu.
Saraakiishan ayaa xilalka iska casilay ka dib markii la xiray, iyadoo lagu tuhunsan yahay inay ku lug lahaayeen soo dejinta shidaal degdeg ah oo qiimo sare lagu iibsaday, kana baxsan nidaamka heshiiska dowladaha. Dambi baarayaasha ayaa sheegayaan in xogta kaydka shidaalka la been abuuray si loo muujiyo jiritaanka yaraansho, taas oo sababtay in la oggolaado iib degdeg ah oo shidaal ah oo markii dambe la sheegay inuu ahaa mid tayo liita.
Baaritaanka ayaa sidoo kale eegaya farqiga weyn ee qiimaha u dhexeeya laba shixnad oo bishii Maarso la keenay, iyadoo mid lagu keenay qiimo aad uga sarreeya kan kale. Madaxweynaha dalka ayaa mar kale ballanqaaday in lala dagaallami doono kooxaha musuqmaasuqa ee ka dhex jira waaxda tamarta. Dhanka kale, Xafiiska Xeer ilaalinta Qaranka ayaan weli ka hadlin xaaladda dacwaddan, mana cadda in faylka baaritaanka loo gudbiyay.
