Guddiga qaran ee isdhexgalka iyo mideynta shacabka ee NCIC ayaa sheegay in haweenka ay door muhiim ah ka qaataan arrimaha nabadgalyada iyo dib u heshiisiinta.
Waxaa uu guddigu sheegay in kaalintan aan la fududeysan karin sidaas awgeedna ay haweenka mudan yihiin in lagu sharfo .
Guddiga ayaa sheegay inuu u hambalyeeynaya dumarka maadaama maanta dunida looga dabaal degaya maalinka adduunka ee haweenka.
Waxaa farriin tani la mid ah soo saaray madaxa xisbiga ODM Raila Odinga oo sheegay in haweenka ay si joogto ah waxyaabo badan ugu hureen qaranka iyo baniaadanimada.
Wasaaradda adeegga dadweynaha iyo jinsiyadda ee dalka ayaa dhankeeda sheegtay in dumarka aan matalaad buuxda la siin marka la eego geeddisocodka go’aan qaadashada.
Waxay wasaaraddu tilmaantay in ay dadaal badan ku bixin doonto sidii haween badan ay uga qayb geli lahayeen wada- hadallada lagu go’aamiyo arrimaha masiiriga ah.
Sidoo kale wasaaradda adeegga dadweynaha iyo jinsiyadda ee Kenya ayaa xustay in ay xoogga saareyso ka dhabeynta hiigsiga ku aaddan mustaqbal loo wada siman yahay.
Guddiga NCIC oo haweenka ku ammaanay kaalinta ay ka qaataan nabadda
