Golaha Sare ee Muslimiinta Kenya (SUPKEM) ayaa cambaareeyay wararka sheegaya in gantaallo iyo diyaarado aan duuliye lahayn lagu weeraray magaalada barakeysan ee Makka ee dalka Sacuudiga, isagoo sheegay in weerar kasta oo lagu qaado magaaladaasi uu yahay mid aan la aqbali karin.
Bayaan ay soo saartay, SUPKEM waxay sheegtay in Makka, oo ay ku taallo Masjidka Xaramka, oo ka mid ah goobaha ugu barakaysan Islaamka, laga ilaaliyo colaadaha socda iyo xiisadaha siyaasadeed ee gobolka Bariga Dhexe.
Guddoomiyaha Qaranka SUPKEM, Al-Hajj Hassan Ole Naado, ayaa sheegay in aan la oggolaan karin in goobaha barakeysan la weeraro, iyadoon loo eegin cabashooyinka ama khilaafaadka sababay colaadaha ka socda gobolka.
Wuxuu sheegay in goobaha barakeysan ee Makka iyo Madiina ay yihiin meel ay Muslimiinta dunidu ku midoobaan, sidaas darteedna aan loo adeegsan karin ama aan lagu dhex dari karin khilaafaadka siyaasadeed.
SUPKEM waxay sheegtay inay garab taagan tahay dowladda Sacuudiga dadaallada lagu ilaalinayo goobaha barakeysan, lagana dhowrayo saameynta colaadda socota.
SUPKEM waxay ugu baaqday dhammaan dhinacyada ku lugta leh colaadda Bariga Dhexe inay ilaaliyaan goobaha barakeysan iyo goobaha cibaadada, ayna ka fogaadaan in la weeraro.
