Ciidamada Dambi-baarista dalka ee (DCI) ayaa burburiyay shabakad ku lug lahayd soo saarista iyo qaybinta khamriga sharci-darrada ah, kaddib howlgal sirdoon oo laga fuliyay deegaanka Oletepesi oo duleedka magaalada Eldoret ah.
Howlgalka oo ay si wadajir ah u fuliyeen kooxda Hawlgallada Gaarka ah ee DCI , (OAT) iyo saraakiil kale oo ka hawlgala ismaamulka Uasin Gishu ayaa lagu soo qabtay Francis Mutuma Gikunda, oo lagu tilmaamay maskaxdii ka dambeysay warshad si qarsoodi ah u soo saareysay una farsamaynaysay khamri been abuur ah.
Booliiska ayaa sheegay in eedeysanaha lagu qabtay isagoo watay gaari noociisu yahay Toyota Voxy, ka hor inta uusan ciidamada u hoggaamin guri aan weli la dhammaystirin oo loo beddelay xarun lagu farsameeyo laguna baakadeeyo khamriga sharci-darrada ah.
Baaritaankii goobta ayaa lagu helay kartoonno ay ku jireen cabitaanno khamri ah oo been abuur ah, agab lagu farsameeyo, iyo summado magacyo caan ah sida Medal Vodka, Smart Vodka, Best Gin, iyo Silver Star.
Sidoo kale waxaa la helay shaambado canshuureed oo been abuur ah oo loo ekaysiiyay midda Hay’adda Dakhliga ee Kenya (KRA), kuwaas oo loo adeegsan jiray in khamriga sharci-darrada ah ay ka dhigaan mid rasmi ah.
Baaritaannada hordhaca ah ayaa muujinaya in ethanol-ka lagu soo gelin jiray dalka isagoo ka soo gudbaya xadka Busia, kadibna lagu farsameyn jiray laguna qaybin jiray suuqyada Eldoret iyo dowlad deegaannada dariska la ah.
Howlgalka ayaa sidoo kale lagu qabtay laba qof oo kale oo lagu kala magacaabo Frank Kamau Mwangi iyo Moses Mungai Kipishi, kuwaas oo la sheegay inay ka qayb qaadanayeen soo saarista iyo farsameynta khamriga.
Ciidamada ayaa goobta ka soo qabtay 20 kartoon oo khamri sharci-darro ah, 10 kartoon oo hore loo hagaajiyay oo diyaar u ahaa in la qaybiyo, dhowr jeerikaan oo waaweyn oo loo adeegsan jiray howlaha warshadda, iyo gaari noociisu yahay Toyota Wish oo siday khamri sharci-darro ah.
Saddexda eedeysane ayaa weli ku jira gacanta booliiska, iyadoo baaritaannadu ay socdaan si loo soo qabto xubnaha kale ee la tuhunsan yahay inay ka tirsan yihiin shabakaddan.
