Hay’adda Dambi-baarista Kenya ee (DCI) ayaa shaacisay inay la wareegtay baaritaanka kiiska la xiriira afduubka la sheegay in loo geystay ganacsade Jimmy Mutava, kaddib warbixin laga diiwaangeliyay saldhigga booliiska ee Mlolongo 27-kii bishii Luulyo 2026.
War-saxaafadeed ay maanta soo saartay DCI ayaa lagu sheegay in baarayaasha ka tirsan waaxda la dagaallanka afduubyada ay hadda hoggaaminayaan baaritaanka, iyagoo ku howlan dabagalka dhowr qof oo daneynaya baaritaanka si loo ogaado duruufaha dhabta ah ee ku xeeran dhacdadan.
DCI ayaa sheegtay in baaritaannadu ay weli socdaan, isla markaana dadweynaha lala wadaagi doono xogaha muhiimka ah marka ay soo baxaan horumarro cusub oo ku saabsan kiiska.
Hay’addu waxay ugu baaqday cid kasta oo haysa xog ka caawin karta baaritaanka inay si qarsoodi ah ula wadaagto DCI
Baaritaanka DCI-da ayaa yimid iyadoo la joogo maalintii lixaad tan iyo markii la afduubay ganacsadaha lagu magacaabo Jimmy Mutava Mwanzia, iyadoo muuqaallo cusub oo laga helay kaamirooyinka amniga (CCTV) ay iftiimiyeen dhacdooyinkii ka horreeyey afduubkiisa iyo dadkii ugu dambeeyey ee la kulmay.
Muuqaallada ayaa muujinaya dhaqdhaqaaqyadii Jimmy Mutava Mwanzia ka hor, intii uu socday iyo ka dib markii la afduubay.
Dadka lagu arkay muuqaalka waxaa ku jira sarkaal sare oo ka tirsan saldhigga booliiska ee Mlolongo, kaas oo la sheegay inuu kulan la yeeshay ganacsadaha ka hor inta uusan si lama filaan ah u waayin.
Qoyska Jimmy Mutava ayaa sheegay in muuqaallada cusub ay dhalinayaan su’aalo hor leh oo ku saabsan sida afduubku u dhacay iyo doorka ay ku lahaan karaan dadkii goobta joogay.
Waxay sidoo kale dalbanayaan in dowladda iyo hay’adaha ammaanka ay si degdeg ah u caddeeyaan halka uu ku sugan yahay.
