Warbixin cusub oo uu soo saaray Xafiiska Kormeeraha Miisaaniyadda ayaa muujisay in dowlad deegaannada Wajeer, Siaya iyo Nairobi ay ka mid yihiin kuwii ugu isticmaalka badnaa nidaamka gacanta lagu bixiyo mushaharka, inkastoo ay jirtay amar ku waajibinayey dhammaan ismaamullada inay u wareegaan Nidaamka Macluumaadka Maareynta Shaqaalaha (HRIS). Intii u dhexeysay bilihii July 2025 iyo March 2026, ugu yaraan 5.19 bilyan oo shillin ayaa lagu bixiyey nidaam ka baxsan madasha dijitaalka ah. Wajeer ayaa ugu sarreeyey iyadoo lagu bixiyey 480 milyan oo shillin, waxaa ku xigay Siaya oo bixisay 401.65 milyan iyo Nairobi oo bixisay 311 milyan oo shillin.
Warbixinta ayaa sheegtay in 43 dowlad deegaan ay weli adeegsadeen nidaamka mushahar bixinta gacanta, iyadoo lacagaha intooda badan lagu bixiyey mushaharka shaqaalaha ku meel gaarka ah iyo gunnooyinka dheeraadka ah ee ciidamada ammaanka. Ismaamullada kale ee lacagaha badan ku bixiyey nidaamkan ayaa waxaa ka mid ahaa Mandheera, Tharaka Nithi, Nakuru, Kitui, Meru, Mombasa, Kiambu, Lamu, Kilifi, Gaarisa iyo Elgeyo Marakwet. Kormeeraha Miisaaniyadda Margaret Nyakang’o ayaa ka digtay in nidaamka gacanta uu halis gelinayo hantida dadweynaha, isla markaana uu fursad u abuuri karo musuqmaasuq iyo bixinta mushahar shaqaale aan jirin.
Warbixinta ayaa sheegtay in sababaha ay ismaamullada u bixiyeen isticmaalka nidaamka gacanta ay ka mid yihiin dib u dhaca bixinta lambarrada shaqaalaha, dhammeystir la’aanta diiwaangelinta HRIS, shaqaalaha ku meel gaarka ah, gunnooyinka iyo lacagaha sharciyeysan, gunnooyinka ciidamada ammaanka, dhibaatooyinka isku xirnaanta internetka iyo dukumentiyo shaqaale oo dhammaystirnayn. Dhanka kale, dowlad deegaannada Narok, Trans Nzoia, Turkana iyo Uasin Gishu ayaa noqday kuwa keliya ee sheegay in muddada warbixinta daboolaysay aysan wax mushahar ah ku bixin nidaamka gacanta.
