Dowladda ayaa sare u qaaday heerka feejignaanta iyo diyaar garowga caafimaad ka dib markii la soo sheegay dillaaca caabuqa Hantavirus, kaas oo lala xiriiriyay markab dalxiis oo marayay Badweynta Atlaantik. Mas’uuliyiinta caafimaadka ayaa sheegay in ilaa hadda aan wax kiis ah laga xaqiijin gudaha dalka, balse la adkeeyay kormeerka garoomada diyaaradaha iyo dekedaha dalka.
Xoghayaha Joogtada ah ee Caafimaadka Dadweynaha Mary Muthoni ayaa sheegtay in dowladda ay xoogga saarayso ka hortag muddo dheer ah halkii ay ka sugi lahayd xaalad degdeg ah. Waxaa ay tilmaantay in dowladda ay xoojinayso nidaamyada dabagalka cudurrada si si hore loogu ogaado cudurrada ka yimaada xoolaha, gaar ahaan kuwa la xiriira jiirka iyo isbeddelka cimilada.
Mary Muthoni ayaa sidoo kale sheegtay in Dhiirrigeliyeyaasha Caafimaadka Bulshada ay door muhiim ah ka qaadan doonaan wacyigelinta bulshada iyo tallaabooyinka kahortagga ee heer deegaan. Dowladda ayaa sheegtay in nidaamyada dijitaalka ah ee dabagalka cudurrada iyo shabakadaha shaybaarrada caafimaadka la geliyay heegan sare.
Sida ay sheegtay Hay’adda Caafimaadka Adduunka ee WHO, siddeed kiis oo ay ku jiraan saddex dhimasho ah ayaa laga diiwaangeliyay markabka laga leeyahay dalka Netherlands ee MV Hondius. Baaritaanno hordhac ah ayaa muujiyay in cudurka uu yahay nooca Andes strain ee caabuqa Hantavirus, kaas oo ah nooc dhif ah oo awood u leh inuu si xaddidan qof qof ugu gudbo. Wasaaradda Caafimaadka ayaa sidoo kale fartay ismaamullada inay diyaariyaan xaruumo karantiil, xoojiyaan tallaabooyinka kahortagga caabuqa, isla markaana sare u qaadaan wacyigelinta bulshada.
