Kenyaanka qaybahooda kala duwan ayaa lagu casuumay inay soo gudbiyaan aragtidooda ku saabsan hindise sharciyeed cusub oo lagu soo jeediyay in lagu daro maaddo qasab ah oo cusub oo loo bixiyay “Cilmiga Sayniska Qarannimada,” taas oo laga dhigi doono mid laga barto dhammaan heerarka waxbarashada ee dalka. Qoraallada talo bixinta ah ayaa la doonayaa in la gudbiyo ka hor 18-ka bishan May.
Hindisahan ayaa ku jira Xeerka Waxbarashada (Wax-ka-beddelka) 2025, kaas oo hadda horyaalla Golaha Shacabka si loo falanqeeyo. Waxaa hindisaha soo gudbiyay xildhibaanka deegaanka Koonfurta Suba, Caroli Omondi, waxaa uuna qeexayaa maaddadan cusub inay tahay barnaamij lagu kobcinayo qiyamka qaran, mideynta bulshada, iyo waajibaadka muwaadinnimada.
Maaddada “Cilmiga Sayniska Qarannimada” ayaa lagu dari doonaa barnaamijyada waxbarashada ee carruurta yaryar, waxbarashada aasaasiga ah, xaruumaha farsamada iyo jaamacadaha. Waxaa ay si toos ah ula jaanqaadi doontaa Qodobka 10-aad ee Dastuurka dalka, kaas oo dhigaya qiyamka qaran sida waddaniyadda, midnimada, sharciga, dimuqraadiyadda, ka qaybgalka dadweynaha, caddaaladda bulshada iyo horumar waara.
