Ku dhowaad 8 milyan oo qof oo ku nool Suudaanta Koonfureed ayaa wajahaya halis cunto yari daran, iyadoo colaado iyo barakac ay sii xumeeyeen xaalad bini’aadantinimo oo hore u liidatay, sida lagu sheegay warbixin ay soo saartay hay’adda Qaramada Midoobay.
Warbixinta oo la daabacay Talaadadii shalay ahayd ayaa sheegtay in qiyaastii 7.8 milyan oo qof, oo u dhiganta in ka badan kala bar dadka dalka, ay la kulmi doonaan heerar sare oo cunto yari ah bilaha soo socda. Sidoo kale, tirada carruurta yar yar ee la ildaran nafaqo xumo daran ayaa si weyn u korortay.
Hay’adaha Qaramada Midoobay ee FAO, WFP iyo UNICEF ayaa ugu baaqay beesha caalamka in si degdeg ah loo caawiyo dalkaas si looga hortago musiibo bini’aadantinimo oo sii ballaaran karta, iyagoo sheegay in carruur badan ay halis ugu jiraan dhimasho.
Xaaladda ayaa uga sii dartay Suudaanta Koonfureed oo ah dalka ugu da’da yar caalamka, iyadoo colaado qabiil, isbeddelka cimilada, iyo saameynta dagaallada Suudaan ay sii adkeeyeen nolosha shacabka, halka dhaqaalaha daciifka ah uu sii xoojiyay dhibaatada.
