Warbaahinta Mareykanka, oo ay ka mid yihiin Reuters iyo ilo kale, ayaa sheegaya in madaxweynaha Mareykanka Donald Trump uusan ku qanacsanayn soo jeedin cusub oo ka timid Iiraan. Soo jeedintaas ayaa lagu sheegay in dib loo dhigo ka hadalka barnaamijka nukliyeerka ee Iiraan ilaa uu dhammaado dagaalka socda.
Sida ay sheegeen ilo xog ogaal ah kulan Trump uu la yeeshay la taliyayaashiisa, Mareykanka ayaa doonaya in arrinta nukliyeerka si degdeg ah looga hadlo halkii dib loo dhigi lahaa. Trump ayaa la sheegay in uu muujiyay diidmo ku saabsan qorshaha Iiraan.
Warbixin uu soo xigtay wargeyska The New York Times ayaa tilmaamtay in Trump uu la taliyayaashiisa u sheegay inuusan ku qanacsanayn soo jeedinta Iiraan, taasoo muujinaysa in mowqifkiisa uu weli yahay mid adag oo aan dabacsanayn.
Warbaahinta CNN ayaa dhankeeda sheegtay, iyadoo soo xiganaysa ilo ku dhow wada hadallada, in Mareykanka uu u badan yahay inuusan aqbali doonin soo jeedinta. Waxaa ay intaas ku dartay in haddii Mareykanka uu qaado xayiraadaha dekedaha Iiraan iyadoo aan la xallin arrinta nukliyeerka, ay lumin karto awoodda cadaadiska ee Xukuumadda Washington ku leedahay wadahadallada.
