Wasiirka Wasaaradda Arrimaha Gudaha Kipchumba Murkomen ayaa bogaadiyay ololaha ka dhanka ah burcadda ee dowladda ee ka socda gobolka Waqooyiga Rift Valley, isagoo ku dhawaaqay tallaabo weyn, taasoo ah soo wareejinta ikhtiyaari ah oo in ka badan 700 oo qori oo sharci darro ah lagu soo wareejiyay ilaa hadda.
Isagoo ka hadlayay ismaamulka Elgeyo-Marakwet wasiirka ayaa wuxuu ku tilmaamay jawaabta bulshada mid “aan la rumaysan karin,” isagoo la yaabay in bulshada uu ku soo koray ay si ikhtiyaari ah u wareejiyaan hubkii huriyay sannado badan oo rabshado joogto ah.
Wasiirka ayaa ku dhawaaqay in dowladda ay diyaarinayso fal xooggan oo astaan u ah si loo muujiyo dhammaadka joogtada ah ee xilligii burcadda, kaas oo ah gubista hubka la helay.
Murkomen ayaa xaqiijiyay in gubista hubkan ay dhici doonto marka tirada guud ee hubka la dhiibay ay gaarto 1,000 xabo isagoo sheegay inuu kula heshiiyay Madaxweyne William Ruto in lagu gubo deegaannada Kolowo ama Tot.
Wasiirka ayaa sidoo kale digniin adag u diray kuwa aan weli dhiibin hubkooda, isagoo xusay in dowladda ay sirdoon xooggan ka haysato dhammaan milkiilayaasha hubka sharci darrada ah ayna filayso in si buuxda loogu hoggaansamo.
Waxaa uu ku nuuxnuuxsaday in nabadda Dooxada Kerio aysan hadda ahayn mid jilicsanayn, isagoo ku dhawaaqay inay tahay mid joogto ah oo ay taageerayaan howlgallo amni oo joogto ah.
