Dufcaddii afaraad ee ciidanka booliiska ee loo diray dalka Haiti, kana tirsanaa howlgalka Taageerada Amniga Caalamiga ah (MSS), ayaa dib ugu soo laabatay waddanka, taas oo si rasmi ah u soo afjartay kaalintii Kenya ee howlgalkaas lagu xasilinayay xaaladda amni ee dalkaas.
Tirada askarta soo laabatay oo dhan 150 ayaa fiidnimadii xalay ka degay Garoonka Caalamiga ah ee Jomo Kenyatta (JKIA), halkaas oo ay ku soo dhaweeyeen saraakiil sare oo amni. Howlgalka ayaa billowday sanadkii 2024-kii ka dib oggolaansho uu bixiyay Golaha Ammaanka ee Qaramada Midoobay.
Kooxdan ayaa waxaa hoggaaminayay Ku xigeenka Taliyaha Guud ee Booliiska Maamulka, Gilbert Masengeli, oo hore ugu sugnaa Haiti si uu ula yeesho wada hadallo heer sare ah mas’uuliyiinta dalkaas. Waxaa garoonka ku qaabilay Taliyaha Guud ee Booliiska, Douglas Kanja, oo ay weheliyaan La taliyaha Amniga Qaranka, Joseph Boinett, iyo Ku xigeenka Taliyaha Booliiska, Eliud Lagat, iyo saraakiil kale.
Kenya ayaa howlgalka u dirtay ku dhowaad 980 askari oo loo diray marxalado kala duwan, si ay gacan uga geystaan xasilinta Haiti, gaar ahaan caasimadda Port-au-Prince oo ay gacanta ku hayeen kooxo hubeysan. Soo laabashada ugu dambeysay ayaa daba socotaa kuwo hore oo dhacay bilihii Disembar 2025-kii iyo Maarso 2026, ka dib dhammaystirka howlgal socday 18 bilood.
Howlgalka MSS ayaa hadda isu beddelay qaab cusub oo loo bixiyay Ciidanka La dagaallanka Kooxaha Hubeysan (GSF), kaas oo la filayo inuu ka koobnaado ilaa 5,500 askari oo isugu jira booliis iyo militari, si ay ula shaqeeyaan booliiska iyo ciidanka Haiti. Saraakiisha ayaa sheegay in khibradda ay askarta Kenya halkaas ka heleen ay kaalin weyn ka qaadan doonto xoojinta ammaanka gudaha dalka, iyadoo sidoo kale la xusay askartii ku naf waayay howlgalka iyo taageerada loo fidinayo qoysaskooda.
