Wasiirka Caafimaadka Aden Duale ayaa ku dhawaaqay in la xiray 12 xarumood oo caafimaad, kaddib markii lagu helay musuqmaasuq la xiriira Maamulka Caymiska Caafimaadka ee SHA, taasi oo qayb ka ah hawlgallo baahsan oo dalka ka socda.
Isagoo maanta ka hadlayay magaalada Garissa, Duale wuxuu carrabka ku adkeeyay shan ismaamul oo hoggaaminaya xarumaha looga shakisan yahay inay sameeyeen sheegashooyinka lacagta caafimaad oo been-abuur ah, kuwaas oo looga golleeyahay in si sharci-darro ah lacag lagu helo.
Soddon iyo sideed xarumood ayaa hadda wajahaya dacwado maxkamadeed, iyadoo tirada guud ee xarumaha la xiray tan iyo markii uu hawlgalku bilaabmay ay hadda gaartay 1,000.
Xarumaha diiradda lagu hayo waxaa ka mid ah Isbitaalka Bungoma West ee Ismaamulka Bungoma, kaas oo laga saaray liiska xarumaha la shaqeeya SHA bishii Maarso 30-da, muddo 90 maalmood ah, kaddib markii lagu eedeeyay falal musuqmaasuq oo la xiriira sheegashooyinka lacagaha.
Xarunta ayaa lagu amray inay si degdeg ah u wareejiso dhammaan bukaannada ku jira xarumaha kale ee heshiiska kula jira SHA ee u dhow.
Si kastaba ha ahaatee, isbitaalka ayaa eedeymahaas ku tilmaamay kuwo aan sal iyo raad toona lahayn, wuxuuna sheegay inuu u adeego tiro badan oo bukaanno ah oo ay dhibaato kasoo gaari doonto hakinta adeegga.
Xarumaha kale ee la calaamadeeyay oo la hakiyay waxaa ka mid ah:Baypharm Medical Centre (Homa Bay),Dawida Annex Hospital Ltd (Taita Taveta), Kerugoya Medical Centre (Kirinyaga), Raycos Health Centre (Mombasa), Calvary Hope Medical Centre (Bungoma), Shamberere Dispensary (Kakamega), Kurafa Medical Centre (Kiambu) ,Umoja Three Medical Centre (Nairobi) ,The Pro Elite Westlands General and Specialist Hospital Ltd (Nairobi)
Wasiirka ayaa ka digay in aanay jirin wax faragelin siyaasadeed ah oo joojin kara hawlgalkan socda.
Duale ayaa sheegay in Ismaamullada Bungoma, Kisii, Homa Bay, Mandera iyo Wajir inay yihiin kuwa ugu horreeya ee looga shakisan yahay sheegashooyinka musuqmaasuqa SHA, wuxuuna uga digay xarumaha ka hawlgala ismaamulladas in kormeer adag lagu samayn doono.
