Madaxa Golaha Wasiirada ahna Wasiirka Arrimaha Dibadda iyo Qurbajoogta, Musalia Mudavadi, ayaa gaaray magaalada Addis Ababa ee dalka Itoobiya, si uu uga qaybqaato Kalfadhiga 49-aad ee Caadiga ah ee Golaha Fulinta ee Midowga Afrika AU, kaas oo loo qorsheeyay 28-ka ilaa 29-ka Luulyo 2026.
Inta uu socdo kulammada Wasiirada iyo wada-tashiyada labada dal, wuxuu olole u geli doonaa Garsoore Phoebe Okowa, oo ah murashaxa Kenya u taagan doorashada Maxkamadda Adduunka ICJ ee xilliga 2027–2036, iyo Garsoore Njoki Ndung’u, oo ah murashaxa Kenya u taagan doorashada Maxkamadda Dembiyada caalamiga ICC ee isla xilligaas.
Wasiirrada Arrimaha Dibadda ee ka yimid Afrika ayaa isugu imaan doona si ay uga wada xaajoodaan arrimaha muhiimka ah ee qaabeeya xukunka, is-dhexgalka, nabadda, dib-u-habeynta hay’adaha iyo hawl-galka caalamiga ah ee Afrika.
Kulanka Golaha Fulinta ayaa yimid ka dib Kalfadhigii 52-aad ee Caadiga ahaa ee Guddiga Wakiillada Joogtada ah PRC oo la qabtay June 2026.
Kalfadhigan ayaa sidoo kale u adeegi doona diyaarinta Midowga Afrika ka hor Kulanka Isku-dubbaridka Dhexe ee Sannadka 8-aad MYCM ee u dhexeeya Midowga Afrika, Bulshooyinka Dhaqaalaha Gobolka RECs iyo Hababka Gobolka RMs, kaas oo loo qorsheeyay 4ta Oktoobar 2026 inuu ka dhaco magaalada El Alamein ee dalka Masar.
Kahor Golaha Fulinta, Mudavadi wuxuu ka qaybqaadan doonaa Guddiga Wasiirada ee Murashaxiinta Afrikaanka ah ee Nidaamka Caalamiga ah, halkaas oo Kenya ay xubin ka tahay oo ay matasho Bariga Afrika iyada oo la socota Uganda.
Guddigu wuxuu door muhiim ah ka ciyaaraa iskudubaridka taageerada Afrika ee murashaxiinta u qalmada Afrikaanka ah ee raadinaya doorashada hay’adaha caalamiga ah.
Dowladda Kenya waxay ku kalsoontahay in labada murashax ay leeyihiin aqoon garsoor oo gaar ah, waayo-aragnimo sharci oo caalami ah oo ballaaran, iyo go’aan adag oo aan gabbasho lahayn oo ku aaddan sharciga, taas oo ka dhigaysa kuwo u qalma inay u adeegaan bulshada caalamka.
Doorashadooda, ayuu yiri Wasiirka arrimaha dibadda, waxay sii xoojin doontaa codka iyo matalaadda Afrika ee dhismaha caddaaladda caalamiga ah iyadoo xaqiijinaysa tabarucaadka fog ee Kenya ee horumarinta sharciga caalamiga ah.
Dhinacyada golaha fulinta, Mudavadi wuxuu yeelan doonaa kullamo taxane laba geesood ah oo uu la yeelan doono Wasiirrada Arrimaha Dibadda iyo madaxda sare ee dowladaha ee ka kala yimid daafaha Afrika.
Wada-hadallada ayaa diiradda saari doona xoojinta xiriirka diblomaasiyadeed iyo dhaqaale, dhiirrigelinta nabadda iyo amniga gobolka, kor u qaadista iskaashiga ganacsiga iyo maalgashiga, abaabulka taageerada murashaxiinta garsoorka ee Kenya, iyo dhisidda is-afgaradka ku saabsan hirgelinta ajandaha Dib-u-habeynta Hay’adaha Midowga Afrika, gaar ahaan maalgelinta waarta ee Midowga.
