Ururka Macallimiinta Dugsiyada Sare iyo Dhexe ee (KUPPET) ayaa ka digay xaaladda amni ee macallimiinta ka howlgala gobolka Waqooyi Bari, gaar ahaan ismaamulka Gaarisa, iyadoo la sheegay in khataro sii kordhaya ay saameyn ku yeesheen shaqadooda iyo badbaadadooda.
Xoghayaha guud ee ururka, Akelo Misori, ayaa sheegay in amni darrada ka jirta waddooyinka waaweyn iyo goobaha waxbarashada ay sababtay dhaawacyo iyo carqalad ku timaadda safarka macallimiinta, xilli dugsiyada ay dib u furmeen xilli dugsiyaadka labaad ee sanadka. Waxaa uu tilmaamay in waddada u dhaxaysa Nairobi iyo Gaarisa ay noqotay meel si joogto ah ay uga dhacaan falal rabshado ah.
Qaar ka mid ah macallimiinta ayaa la sheegay inay ku dhaawacmeen weerarrada, halka kuwo kale ay dib u dhigeen ama gabi ahaanba joojiyeen safarradooda sababo la xiriira cabsi amni. Sidoo kale, ururka ayaa sheegay in macallimiinta horey ugu sugnaa gobolka ay wajahayaan cabsi joogto ah, taas oo saameyn nafsi iyo mid jireed ku reebtay.
KUPPET ayaa ugu baaqay Guddiga Adeegga Macallimiinta (TSC) iyo hay’adaha ammaanka inay iska kaashadaan sugidda badbaadada macallimiinta, labadaba inta ay safarka ku jiraan iyo goobaha ay ka shaqeeyaan. Ururka ayaa sidoo kale cambaareeyay rabshadaha iyo xadgudubyada xuquuqda aadanaha, isagoo dalbaday in tallaabo adag laga qaado cid kasta oo ka dambeysa amni darrada.
