Kumanaan Kenyan ah oo taageeri jiray, isla markaana qadarin weyn u hayay hoggaamiyihii siyaasadeed ee Kenya Raila Odinga, ayaa weli ku qulqulaya xarunta Migwena ee Bondo, ismaamulka Siaya, si ay uga qayb qaataan xuska sannad-guuradii koowaad ee geeridiisa.
Dad badan ayaa goobta soo gaaray aroortii hore, qaarna waxay yimaadeen lixdii subaxnimo. Waxaa halkaas ka socday heeso iyo ciyaaro lagu maamuusayo ra’iisul wasaarihii hore, iyadoo ciidamada boolisku heegan ugu jireen hagidda iyo kala hagaajinta dadka si ay u galaan goobaha loo asteeyay.
Qoyska Odinga ayaa ka codsaday dadka ka soo qaybgalaya inay munaasabadda ka ilaaliyaan siyaasadda, iyagoo xusay in Raila uu ahaa hoggaamiye si weyn u aaminsanaa midnimada Afrika, isla markaana dhiirrigelin jiray wadajirka xisbiyada siyaasadeed.
Xaaskii uu ka dhintay Ida Odinga, iyo guddoomiyaha ismaamulka Siaya, James Orengo, ayaa ku baaqay nabad iyo is-xakameyn siyaasadeed. Waxay hoggaamiyeyaasha ugu baaqeen inay munaasabadda diiradda saaraan xusuusta iyo dhaxalka uu Raila ka tagay.
Waxaa la filayaa in munaasabadda ay ka soo qaybgalaan saaxiibbadii dhowaa ee Raila ee ka midka ah hoggaamiyeyaasha Afrika, iyo sidoo kale siyaasiyiin kale.
Maalintii Talaadada, Ida ayaa kormeer ku samaysay diyaar-garowga munaasabadda, iyadoo shacabka Kenya ugu baaqday inay Raila si sharaf leh u maamuusaan, kana fogaadaan in xuska loo beddelo loollan u dhexeeya garabyada siyaasadeed.
Munaasabadda ayaa lagu wadaa inay ka koobnaato bandhigyo muusig iyo hawlo dhaqameed, kuwaas oo ka tarjumaya caadooyinka muddada dheer lagu yaqaanay isu imaatinnada ka dhaca xarunta Migwena, oo taariikh gaar ah ku leh qoyska Odinga.
Guddoomiyaha Guddiga Qaran ee Isku-dubbaridka Munaasabadda Sannad-guurada, Prof. Adams Oloo, ayaa sheegay in xarunta Migwena ay tahay goob ku habboon munaasabadda.
Maalintii Talaadada, Ida ayaa mar kale hoggaamisay kormeerka diyaar-garowga munaasabadda, iyadoo shacabka Kenya ugu baaqday inay Raila si sharaf leh u sagootiyaan, kana fogaadaan in xuska loo beddelo tartan siyaasadeed oo u dhexeeya garabyada kala duwan.
Siyaasigan miisaanka weyn ku lahaa Kenya ayaa geeriyooday 15-kii Oktoobar 2025, isaga oo 80 jir ah, xilli uu Hindiya ku qaadanayay daryeel caafimaad.
