Kadib kulan ay Khamiistii Madaxtooyada kula yeesheen Madaxweyne William Ruto, Ururka Shaqaalaha Ilaalada Amniga Kenya KNPSWU, oo uu hoggaaminayo Xoghayaha Guud Mr Isaac Andabwa, ayaa maanta uga mahadceliyay Madaxweynaha dadaallada uu ku taageerayo ajandaha dib-u-habaynta waaxda amniga.
Waxyaabaha ugu muhiimsan ee ururku xusay waxaa ka mid ah hindisaha mushaharka ugu yar ee shaqaalaha iyo qorshaha lagu beddelayo magaca “watchmen”.
Mr Andabwa ayaa sheegay in hay’adaha iyo ururradu ay si wanaagsan u shaqayn karaan marka la hirgeliyo dib-u-habaynno kala duwan oo lagu horumarinayo waaxda.
Si kastaba ha ahaatee, Xoghayaha Guud ayaa beeniyay warar ay qaar ka mid ah dadka wax ku qora baraha bulshada faafiyeen oo sheegayay in siyaasadda ay ahayd qodobka ugu weyn ee kulanka, isla markaana ay ka qaybgalayaashu ku dhawaaqayeen erayo siyaasadeed.
Mr Andabwa ayaa sheegay in hadalladii kulanka laga jeediyay aysan ahayn kuwo loogu talagalay in siyaasadda lagu dhex daro arrimaha ururka ama kulanka.
Wuxuu Madaxweyne Ruto ugu baaqay inuu hubiyo in heshiisyadii iyo qodobadii lagu gaaray kulanka Khamiistii si dhab ah loo fuliyo.
