Israa’iil ayaa uga digtay dadka deggan tuulada Habbouch ee koonfurta Lubnaan in ay ka baxaan guryahooda, iyadoo tallaabadan ay qeyb ka tahay dadaallo lagu sii barakicinayo shacabka inkastoo ay jirto xabbad joojin. Amaradan cusub ayaa sii kordhinaya walaaca laga qabo xaaladda amni iyo badbaado ee dadka rayidka ah ee ku nool deegaankaas.
Afhayeenka Carabiga ee ciidanka Israa’iil, Avichay Adraee, ayaa sheegay in dadka laga doonayo in ay si degdeg ah uga guuraan guryahooda oo ay u dhaqaaqaan meel bannaan oo ugu yaraan 1,000 mitir u jirta tuulada. Waxaa uu sidoo kale sheegay in qof kasta oo ku dhow xubnaha Xisbullah, xaruumahooda ama agabkooda militari uu naftiisa halis gelinayo.
Habkan ku dhisan barakicin ballaaran oo lagu fulinayo hanjabaado militari ayaa la sheegay inuu la mid yahay dhaqankii Israa’iil ay u adeegsadeen dagaalkii Qaza, taasoo dhalisay dhaleeceyn ku saabsan saameynta ay ku leedahay dadka rayidka ah.
