Weerarro isdaba joog ah oo ay diyaaradaha aan duuliyaha lahayn ka fuliyeen qaybo kala duwan oo Suudaan ah ayaa maalmihii la soo dhaafay dilay in ka badan 160 qof, sida ay sheegeen shaqaalaha caafimaadka iyo ururrada xuquuqda aadanaha.
Weerar diyaaradeed oo Isniintii ka dhacay Khartuum ayaa dilay saddex carruur ah, sida ay sheegeen Qareennada Gurmadka Degdegga ah (Emergency Lawyers), oo ah koox la socota tacaddiyada ka dhanka ah dadka rayidka ah ee ka dhaca dagaalka sokeeye ee Suudaan. Dhanka kale, in ka badan 160 qof ayaa la sheegay in lagu dilay weerarro ka dhacay gobollada galbeedka dalka tan iyo Jimcihii.
Weerarrada waxaa lagu eedeeyay labada dhinac ee dagaallamaya, kuwaas oo kala ah xoogagga gurmadka degdegga ah ee RSF iyo ciidamada dowladda. Labada dhinac ayaa dagaallamaya tan iyo sannadkii 2023-kii, balse adeegsiga sii kordhaya ee diyaaradaha aan duuliyaha lahayn bilihii u dambeeyay ayaa sababay dhimashada dad rayid ah oo sii badanaysa.
Weerarkii ugu khasaaraha badnaa ee dhowaan dhacay ayaa fiidnimadii Axadda lala beegsaday goob u dhow suuq ku yaalla magaalada Al-Dibab, ee gobolka Kordofan Galbeed, oo ku yaalla koonfur-galbeed Suudaan, isla markaana ay maamusho RSF.
Dadka deegaanka iyo shaqaalaha caafimaadka ayaa sheegay in diyaarad aan duuliye lahayn ay weerartay goob ay gaadiidka dadweynuhu ka baxaan, halkaas oo dad tuulooyinka ka yimid ay isugu soo urureen kaddib maalin suuq ah si ay u helaan gaadiid ay guryahooda ugu laabtaan. Weerarka ayaa dilay 80 qof.
Warbixin ay wakaaladda wararka AFP soo xigatay ayaa sheegtay in 47 qof oo dhaawacmay loo qaaday magaalada u dhow ee Al-Mujlad, halkaas oo 30 ka mid ah ay markii dambe u dhinteen dhaawacyadii soo gaaray, sida uu sheegay ilo caafimaad.
Maamulka ay RSF ku dhawaaqday ee loo yaqaan Tasis iyo kooxda Qareennada Gurmadka Degdegga ah ayaa ciidanka dowladda ku eedeeyay inay fuliyeen weerarka.
Bariga Suudaan, ilo milatari ayaa Axaddii sheegay in nidaamyada difaaca cirka ay qabteen dhowr diyaaradood oo aan duuliye lahayn oo ay RSF soo dirtay, kuwaas oo bartilmaameedsanayay biyo-xireennada Atbara iyo Setit ee gobolka Gedaref, oo qiyaastii 420 kiiloomitir bari kaga beegan Khartuum. RSF wax war ah kama aysan soo saarin dhacdadaas waqtigaas.
Subaxnimadii hore ee Isniinta, weerar kale oo ay fuliyeen diyaaradaha aan duuliyaha lahayn ayaa lagu qaaday magaalada Nyala, oo ah caasimadda gobolka Koonfurta Daarfuur isla markaana ah xarun muhiim u ah RSF.
Ilo caafimaad iyo kuwo ka tirsan RSF ayaa sheegay in weerarka lagu dilay 17 qof, oo ay ku jiraan toddoba sarkaal oo RSF ah, halka 23 kalena ay ku dhaawacmeen.
Weerar ay Jimcihii fulisay diyaarad aan duuliye lahayn oo ay leedahay RSF ayaa lagu qaaday goob ay ku sugnaayeen dad barakacayaal ah oo ku taalla gobolka Niilka Buluugga ah ee Suudaan, kaas oo xuduud la leh Itoobiya. Weerarka ayaa dilay 41 qof, sida ay sheegtay kooxda Qareennada Gurmadka Degdegga ah.
Kooxdu waxay cambaareysay weerarka, iyadoo ku tilmaantay musiibo bani’aadannimo.
