Wasiirka Arrimaha Dibadda ee Iiraan, Abbas Araghchi, ayaa sheegay in weerar dhimasho sababay oo Ukraine ay ku qaaday markab ganacsi oo Iiraan leedahay kana dhacay Badda Caspian aan laga aamusi karin, isaga oo ku tilmaamay xadgudub ka dhan ah Axdiga Qaramada Midoobay.
Qoraal uu Axaddii ku baahiyay baraha bulshada, Araghchi wuxuu ku eedeeyay Israa’iil inay hurisay weerarka, isagoo sheegay inay isku dayayso inay Yurub ku soo jiidato dagaalkeeda.
Wuxuu sheegay in hadalladan uu ku sheegay wada-hadallo uu la yeeshay Madaxa Siyaasadda Arrimaha Dibadda ee Midowga Yurub, Kaja Kallas, iyo Wasiirka Arrimaha Dibadda ee Ruushka, Sergey Lavrov.
Sida ay sheegtay Wasaaradda Arrimaha Dibadda ee Iiraan, weerarkii Ukraine ee Sabtidii ayaa sababay in markabka ganacsigu qarxo, halkaas oo uu ku dhintay hal badmaax, dhowr kalena ay ku dhaawacmeen.
Ukraine ayaa sheegtay inay bartilmaameedsatay markab dagaal oo Ruushku leeyahay iyo maraakiib loo adeegsanayay daabulidda shixnado milatari oo lala xiriiriyo Iiraan gudaha Badda Caspian.
Hase yeeshee, Wasaaradda Arrimaha Dibadda ee Iiraan waxay sheegtay in Iiraan aysan waligeed faragelin khilaafka u dhexeeya Ruushka iyo Ukraine.
Dhanka kale, xildhibaan sare oo Iiraani ah ayaa ka digay in Ukraine ay la kulmi karto aargoosi weerarkaasi awgiis. Qoraal uu Isniintii aroortii ku daabacay barta X, Ebrahim Azizi, oo ah guddoomiyaha Guddiga Amniga Qaranka iyo Siyaasadda Arrimaha Dibadda ee baarlamaanka, ayaa yiri:
“Weerar kasta oo lagu qaado Iiraan mar walba wuxuu leeyahay cawaaqib, arrintaasna maanta sidoo kale way jirtaa; Maraykanka iyo Israa’iil si wanaagsan ayay taas uga warqabaan.”
