Guddiga Qaran ee Jinsiga iyo Sinnaanta (NGEC) ayaa soo dhaweeyay ansixintii Golaha Wasiirrada ee Siyaasadda Carruurta ee Kenya 2025, Hindise sharciga Wax ka beddelka Xeerka Ilaalinta Rabshadaha Guriga ee 2026 iyo warbixinta Kooxda Farsamada ee Madaxweynaha uu u xil saaray Tacaddiyada Jinsiga iyo Dilalka Haweenka. Guddiga ayaa sheegay in go’aannadan, oo Golaha Wasiirrada ay meel mariyeen 30-kii Juun, ay yihiin tallaabo muhiim ah oo lagu xoojinayo shuruucda, siyaasadaha iyo hay’adaha u xilsaaran ilaalinta haweenka, carruurta iyo qoysaska nugul ee dalka. NGEC ayaa xustay in muddo dheer ay ku baaqaysay dib u habeyntan iyada oo adeegsanaysa talooyin siyaasadeed, kormeer, baaritaanno dadweyne, iskaashi hay’adeed iyo wadashaqeyn ay la lahayd hay’adaha dowladda iyo kuwa aan dowliga ahayn.
Guddiga ayaa sidoo kale sheegay inuu door muuqda ku lahaa Kooxda Farsamada ee Madaxweynaha ee Tacaddiyada Jinsiga iyo Dilalka Haweenka, halkaas oo uu ka qayb qaatay qiimeynta caqabadaha sharci, siyaasadeed iyo hay’adeed ee jira ka hor intii aan la soo jeedin dib u habeynta. NGEC ayaa gudbisay talooyin lagu adkeynayo ka hortagga tacaddiyada, taageerada dhibbanayaasha, isla xisaabtanka, iskaashiga hay’adaha iyo ka qaybgalka bulshada, oo ay ku jiraan ragga iyo wiilasha. Guddiga ayaa sidoo kale walaac ka muujiyay kororka kiisaska kufsiga, tacaddiyada iyo dilalka loo geysto carruurta, isaga oo ku baaqay in si degdeg ah loo xoojiyo nidaamyada ilaalinta carruurta, isla xisaabtanka hay’adaha iyo feejignaanta bulshada.
NGEC ayaa ballanqaadday inay sii wadi doonto kormeerka dastuuriga ah ee hirgelinta go’aannada Golaha Wasiirrada, iyadoo sheegtay in guusha dib u habeynta ay ku xirnaan doonto maalgelin ku filan, iskaashi dhow oo u dhexeeya dowladda dhexe iyo ismaamullada, xoojinta nidaamyada ilaalinta, helitaanka caddaaladda waqtigeeda iyo dabagal joogto ah. Guddiga ayaa sidoo kale xaqiijiyay inuu la shaqeyn doono Baarlamaanka, wasaaradda u qaabilsan arrimaha jinsiga, Golaha Guddoomiyeyaasha, Garsoorka, guddiyada dastuuriga ah, hay’adaha horumarinta, ururrada bulshada rayidka ah iyo bulshada inteeda kale si dib u habeyntan u horseeddo isbeddel muuqda oo nolosha haweenka, carruurta iyo qoysaska nugul.
